空姐 形象無晒？ 機上廣播甩轆有理喎！

撰文：杜遊珍 攝影：互聯網

咪住先，阿珍嘅空姐朋友明明話，佢哋職前考試真係要pass 咗中英普3語機上廣播，先可以畢到業，咁無奶油差到咁都上到機？！一再詢問，原來機上廣播甩轆炒粉都有唔同情況同理由，一於同大家分享返！講就咁講，接唔接受就由你喇！

個post 見於空姐 Secrets，連自己友都睇唔過眼！

聯營航班的禍

好似國泰咁，因為要通過廣播考試先可以pass，正常都唔會有咩狀況。不過有時因為同其他航空公司合作，好似日航、南航同馬航咁，對方嘅空姐都有機會做廣播，但「講東話」就……你懂的。而呢類航班安排通常無咁有默契，臨時換人都經常發生，咁窒機都好人之常情咁話。

煲冬瓜並不普通

學過煲冬瓜的都知道佢個名普通，但聲韻調一啲都唔普通。所以話有時聽普通話廣播，都聽到有唔少笑料。好似降落時如噴空氣清新劑，會叫大肚婆掩口，結果孕婦變怨婦。仲有明明係將「鞋子請放椅下」，會變「孩子……」，阿珍身為土生土長香港人，冤苑縣……怨婦……嗯，明嘅！

弄巧成拙矯情廣播

既然乘客對機上廣播咁有期望，有空姐更係出盡力做好佢。開始chok聲先，「歡迎各位親愛萬分嘅乘客乘搭ｘｘ航空，今日嘅機長係型英帥嘅佛倫天奴， 佢係百分百香港人， 有人話佢側面好似chilam……」嘩！唔知仲以為係介紹香港先生出場。其實咁用心，阿珍認為咁都鬧就唔應該啦，但笑佢，係絕對可以嘅！