機艙 失物 事件簿：「你的客艙如何，你的 失物 下落定必如何！」
01 | 階級有別 廉航最渺茫
旅遊記者常常出差，機上賴低嘢個案如恆河沙數，試過漏低採訪收到嘅press gift耳筒、成袋hand carry零食手信，編輯部好粗略統計發現，坐business class搵得番嘅機會真係高啲！
記者試過漏低存相用嘅hard disk喺商務艙，返到屋企先發現，立即打去航空公司，好彩已被送到機場的失物認領處；但有試過在行李帶發現漏低耳筒在經濟艙座位，搵職員立即搜尋已經搵唔番。
若果乘搭的是廉航，尋回機會更渺茫，因為廉航飛機留在停機坪的時間通常只有1小時，乘客一落機，職員就要狂風掃落葉咁清理，失物好可能被當成垃圾棄掉。
02 | 及早發現 尋回機會高
記者試過多次漏咗嘢，立即通知職員都搵得番：試過一落機門醒起漏低頸枕，待所有乘客落機，空姐立即俾我上機攞番；又有1次落機後坐接駁巴士返custom hall，坐車時驚醒漏低咗1把長傘在行李櫃，即時通知職員，結果空姐在下一班車物歸原主；漏低press gift耳筒嗰次過咗海關先發現，職員mark晒邊班機邊個位，結果都搵唔番。
不過空姐回應：「跟足規矩來做，乘客一離開空橋就不能再登機，看情況或由職員陪同返回機艙尋找失物。」
03 | 咁都有人漏低：鑽戒、假牙、義肢
問過多位空姐，原來最多人漏低在飛機上的物件，並非手提電話、銀包或護照一類重要隨身物，而係旅行頸枕、水瓶及頸巾，而且長途機情況最嚴重，因為坐十幾個鐘，隨身物比較多，瞓醒一覺未清醒就落機，漏咗嘢都好正常。
空姐又話試過在商務艙同一個位執過幾條名牌頸巾，洗手間最易找到鑽石婚戒，大件行李都有聽聞過，例如微波爐、47吋大電視都有，但最匪夷所思嘅係貼身物品，例如假牙、義肢同輪椅BB車，唔通神跡降臨，乘客一落機就行得番？
04 | 遺失物件常客 原來是空姐！
唔好以為乘客才是失物認領常客，原來空姐都有份。睇CX Secrets專頁，除咗揞名爆料同投訴之外，也是空姐間尋找失物嘅渠道，空姐在機程時通常忙到甩轆，行前行後左穿右插成程機，胸前name badge經常甩掉在機艙。
暖水壺亦是常見失物，君不知空姐們係唔會飲飛機上嘅熱水嗎？飛long haul時，空姐休息小睡專用的crew bunk是失物黑點，瞓醒後趕急要在狹小的空間換衫化妝再serve客，也難怪會漏低嘢。
