願意同你露營度蜜月的女人，一定娶得過！

撰文：港女講旅行｜攝影：Francis So

結婚同行山一樣，都係呃呃氹氹、互相遷就。

聽到老友帶老婆去 瑞士露營 度蜜月，我當堂嚇一跳，然後得啖笑。我都係行多兩步就會攰嘅一名港女，深明女人出門有幾咁多嘢要準備，出街熱啲要用芭蕉扇，入冷氣房見凍又要披肩，老友你居然夠膽死叫老婆Angel同你揹住十幾公斤的背嚢行山露營，仲要畀晒啲位你擺攝影器材？！
雖然瑞士絕景好靚好靚，但行足咁多日，拎住行李上山落山，咩仙景都睇厭啦，唔怕行行下鬧大交咩？點知平日Cool 爆的老友突然露出搏打的甜笑，「可以遇到個一齊癲的女人，願意一齊分擔旅途上的重量，一定要好好珍惜。佢一定娶得過！」

去過一次瑞士是會上癮的，成日心思思想再出發。

我老友Francis亦不例外，同老婆傾蜜月行程的時候，膽粗粗提出：「不如去瑞士啦，上次我影唔到金三角，好失望，蜜月野營影日出……得唔得啊？」原本以為要花好多口水，點知老婆二話不說就答應。
雖則口爽爽，但是考慮到在接近3千米山上野營溫差大，一到夜晚又大風又乾燥；對港女來講，沖涼又是另一個大問題；最惡頂的是每人揹住十幾公斤上山，拖喼拖死，孭背囊孭死，女友脾氣差少少都隨時觸及臨界點，小則黑面大則鬧交，最驚爆句：「最多咪離婚！」

打牌行山見真章。

為咗令老婆留下浪漫回憶，同時兼滿足自己拍攝私心，死佬Francis 怯住咁準備今次另類蜜月旅行，揀最簡單又睇到最靚風景的行山路徑同野營地點，最後決定在五湖健行徑、巴哈阿爾普湖（Bachalpsee）落腳，每日步行不超過個半鐘，沿途可以睇住靚爆雪山同湖景。不過女人仔拎住咁重裝備，又點會無怨言？
阿嫂Angel 不時忍唔住問：「到未啊？」、「仲有幾耐呀？」呢個時候，做老公就要醒目，絕對唔可以太誠實：「見到啦，嗰度就係！」、「好快到！」（其實仲有好遠）。去個旅行，全程要睇實老婆大人面色做人， 老友話其實苦中有甜。佢自己咪一樣有灰鳩的時候，Angel 反而調轉頭鼓勵返老公：「唔緊要啦，唔係好辛苦啫！」常言道：「打牌行山見真章。」最攰的時候最難掩真性情、壞脾氣，搵到個咁體貼嘅老婆，老友你真係幾生修到啦！

每個攝影師背後，都有個耐性十足的女人。

或者你會話，見到以上的靚景，用肉眼睇都已經好明信片一樣靚，極愛打卡的港女實興奮到暈，再辛苦都唔緊要啦。少年你太年輕了，遇著攝影發燒友如Francis，見到靚景必定大師上身，影極都唔滿意試完又試，仲要影time lapse 實有排影，兼夾阿嫂Angel 係激罕有、唔太鍾意影相嘅港女，可以點做？
Francis 又借啲意盛讚老婆係個超有耐性嘅賢妻，當佢一路行下影下又拍下time lapse，阿嫂從無埋怨，安坐一邊做望夫石，有時反而仲幫個衰公影勁chok 嘅行山相；Francis 都識做，等老婆瞓咗先慢慢影星軌、日出，行山行到每日瞓得唔夠6個鐘，佢都自覺瘋狂，但阿嫂更加唔話得囉！

睇返Francis 呢輯蜜月旅行相，我發覺佢兩個嘅合照無乜幾多張，反而明信片一樣嘅靚相就大把，畀外家知道咁樣虐待剛嫁出去嘅女唔怕咩？跟團或者住resort 歎下咪仲舒服？Francis 忽然情聖上身拋低一句：「可以同老婆一齊在絕景下留倩影，老咗一定唔會後悔。」計我話：

有個能互相支持、互相遷就跟你行山野營嘅老婆，老友，你執到啦！

男士們，學嘢啦！

話說回頭，Angel 同Francis 嘅Honeymoon 又點只野營嘅3日，佢哋花咗20日遊覽維也納同瑞士，在瑞士分別Zermatt 和Grindelwald 共野營了3天，行程唔太chur，中間仲有住靚酒店同玩阿爾卑斯山滑梯等等遊客嘢，氹下老婆無得投訴啦！

瑞士露營蜜月路線
DAY1　由小鎮Zermatt乘火車至Rotenboden，再行20分鐘至Riffelsee湖野營
DAY2　健行1.5小時至Riffelberg乘火車站回Zermatt補給，再坐纜車上Blauherd步行25分鐘至Stellisee湖野營

DAY3　（相隔4日）由小鎮Grindelwald乘登山纜車至First，沿Eiger Ultra Trail健行約1個半小時至Bachalpsee湖野營

留意：
瑞士7至9月的天氣最適合野營； 瑞士並無法例禁止野營，不過部分地方如國家公園、野生動物保護區、森林、河谷等除外，所以出發前記住check清楚。