【絕世筍工】燈塔旅館聘情侶打理 符合呢啲條件就可以申請！
廣告
現今一個初心者踏入社會工作，人工都係萬幾蚊（唔計你係做醫生、護士、律師）。有啲人可能做一世都儲唔夠錢上車，機會嚟喇飛雲！而家美國一個小島嘅燈塔旅館現正招募一對情侶或夫婦營運，年薪達到13萬美金（約101萬港元），有興趣而你又符合以下要求嘅，就可以去試下見工喇！
撰文：Evita | 圖片：East Brother Light Station@Facebook
燈塔旅館聘情侶打理
工作時想遠離繁囂，同愛侶一同去到環境宜人小島上度假嘅話，今次呢個機會你必定唔可以錯過！美國加州聖帕布羅灣一個小島上嘅燈塔旅館現正招募一對情侶或夫婦負責營運。成功者需要為5間客房嘅客人提供服務，包括打掃房間、提供早晚餐等。
島上燈塔East Brother Light Station （東方兄弟燈塔）於1873年開始運作，後來改建為一間有5個房間嘅小型旅館。「東方兄弟燈塔」主席表示會透過分紅方式出糧，如果獲聘情侶令旅館入住率長期爆滿更可以獲得獎金，年薪高達13萬美金！
雖然人工高，但係島上無WI-FI亦無電視，求職者更需要有海岸警衛隊商船營運商執照，以駕船接送住客。由於情侶需要提供膳食畀住客，所以出色嘅烹飪技巧都係一項好重要嘅要求！
現時旅館管理員係Jillian同Che，佢哋早前曾接受外國媒體訪問表示島上生活雖然脫節但係唔會無聊。佢哋將於今年4月離職，新嘅管理員將會於4月接手，入職前會有2個星期訓練。自問可以忍得住無WI-FI同電視，兼有合適船牌嘅你哋就快啲報名喇！
