期間限定韓國賞花！濟州繡球花隧道

Jul 27 2016

今個夏天跟住韓仔韓妹去到濟州做「花癡」，秘境打卡靚位多到數不完。撞正7至8月大爆發的繡球花海，同期仲有盛放金黃色的向日葵花田，睇花易過借火，唔怕你無花睇、無相影，我怕你相機、手機無位咋！

撰文：yuki｜攝影：mark

濟州繡球花隧道花季瘋狂自拍！

韓仔韓妹喜歡在七、八月去濟州來一場小旅行。無他，因為夏天最多靚景睇！去海邊睇出晒名的天使藍海水；又正值繡球花花季，走在街上隨時都可以見到繡球花花影，絕對是影靚相換profile pic 的好機會！不過講到島上最多、最密集的，是當地人賞花名所── 山茶花庭院（카멜리아 힐）。

慎入花隧道

山茶花庭院種植了近二十個繡球品種，加上被園丁悉心栽種，花期特別長，由六月中到八月頭仍然有花睇。廿萬平方米的庭園，園內繡球爭相盛放，行兩步又是一個紫的、藍的、白的、粉的花叢。不過繡球花叢，網上靚相都睇唔少啦！所以港女記者一入場，九秒九衝到距離入口最遠的玻璃溫室前最吸引的靚爆花隧道！

拱形隧道被兩道十米長的花牆包圍，前後左右以至隧道內部皆有花可賞，走入花隧道，繡球花堆在出入口位，彎住身進入，花影愈見疏落，主要集中在頭頂，隧道內左右兩側因為陽光不足只有綠葉。

想簡簡單單打個卡，隧道入口難度最低，隨手影都有身陷花堆之感；想好似模特兒在隧道內影，建議在下晝十二點陽光最猛的時候，容易影到光暗對比的效果。影相位咁多，這條花隧道絕對要慎入，因住出唔返來啊！

玻璃溫室粉色花Cafe

影相影到攰，走入花牆旁邊的玻璃溫室café，今年三月才正式開放，放置一盆又一盆當季的鮮花林景，今個初夏的主角當然是繡球花。店內採自然通風採光，即使沒有強勁的冷氣，但在綠意和花香的包圍之下，仍覺十分寫意。

玻璃牆外一側就是繡球花牆，兩者只有兩步之距，所以窗邊位特別搶手，經常要等先有位。

美中不足的是店內飲品食物選擇不算多，叫杯咖啡居然無貨！意外是馬卡龍食落煙韌軟綿，綠茶和柑橘味不會「甜椰椰」太膩口，再配上一杯顏色搶眼的特飲，叉足電繼續搏殺影靚相！

（上）香橙青檸Mojito W6,000/HK$41
（下）馬卡龍（綠茶、橙味）W2,000/HK$14

（左）鮮榨橙汁 W7,000/HK$48
（右）檸檬梳打 W5,000/HK$34

自家製山茶花油 W8,000/HK$54

山茶花庭院（카멜리아 힐）
地址：濟州道西歸浦市安德面並岳路166（제주특별자치도서귀포시 안덕면 병악로166）（顯示地圖）
營業時間：夏季8:30am-6pm；冬季8:30am-5pm
電話：+82（0）64-792-0088
入場費：成人W7,000/HK$48；13-18歲青少年W5,000/HK$34；12歲以下小童 W4,000/HK$27
交通：由濟州市長途汽車站乘782號巴士至上倉保健所（상창보건소）下車，於對面車站轉乘940號巴士到山茶花庭院下車，全程約50分鐘
網址：camelliahill.co.kr

千個太陽太陽花的後蕊

睇完大爆發的繡球花，仲未止住心底鋪花癡癮，可以睇埋最代表到夏天的太陽花。離濟州市中心30分鐘車程的太陽花農場，花田面積不算大，約有4個足球場大小。農場主人會分別於六片花田栽種，食用、觀賞的品種都有，7月到11月都有機會睇到，重點係免費入場，而且容許訪客走入田中狂影靚相！

向日葵籽雪糕 W3,000/HK$20

向日葵籽油 W13,000/HK$88

出發前記者做足功課，睇準場內天橋前花田的花期，打算由橋上高位拍攝澎湃花海的盛況，不過計漏花朵扭計，面向太陽搵個太陽花的「後蕊」「得」住我！

唔理照影，model 走在花田中，棵棵巨無霸太陽花有人咁高，花朵直徑比手掌更要大，睇背脊一樣震撼！

金京淑向日葵農場（김경숙 해바라기농장）
地址：濟州道濟州市回泉洞391（제주특별자치도 제주시 회천동 391）（顯示地圖）
電話：從缺
營業時間：每日7am -日落
入場費：免費
前往方法：從濟州市外巴士站搭乘 710、720、730號市外巴士，於環境設施管理事務所（환경시설관리 사무소）站下車步行約30分鐘
備註：建議乘的士前往，由濟州市出發約需W15,000/HK$102