澳門打卡新點！變色「巴黎鐵塔」超搶眼｜澳門｜

May 20 2016

去年新濠8字摩天輪開幕，被捧為澳門氹仔新地標。不過繼我話，旁邊巴黎人酒店一樣咁搶眼，將成個巴黎鐵塔 1:2倒模搬去澳門，上星期更率先亮燈！酒店預計今年9月開幕，宮殿外形已經完成，對出的鐵塔亦已經平頂，棚架拆得七七八八，日前亮燈測試迅速被放上網。

老翻巴黎鐵塔

記者亦都查證過，亮燈測試在這一兩個星期不定期進行，最大機會在平日夜晚7點到9點時段見到，想早人一步睇到亦可以去碰個運氣。雖然亮燈唔似真貨銀光閃閃淪為七彩蝦條，不過話晒又多一個影相打卡位，澳門人都好期待，網上仲有大量爆料post 率先預告新酒店設施。

瘋狂變色!

巴黎人縮水鐵塔比原實物小一半，不過加上塔身的燈光、七色彩虹漸變效果超搶眼，屬超A貨！

網上率先爆！

雖則巴黎人預計9月先開，內部資料仍未公開，但有廣告界線人就在討論區大爆新酒店內有咩設施，等我們率先睇睇！
1 鐵塔食中式法國菜
爆料者指鐵塔內會開設法國餐廳Le Chine，菜式會加入亞洲元素，邊食邊可以俯瞰路氹金光大道。
可信度：80%
評：為咗服侍強國豪客，加返少少中式菜都好正常啫！
2 觀景台抄到十足
傳鐵塔共有兩個觀景台，可以睇到路氹和澳門景。
可信度：95%
評：問過相關PR，巴黎鐵塔頂會開放公眾進入，不過用途就未公布得，睇怕收你百幾蚊入場費睇景就最合理啦！加埋中層觀景位，可信度高！

3 闔家歡水世界
酒店內設有音樂表演劇院和水上樂園區，樂園區以海盜做主題，設有巨型海盜船和塔樓。
可信度：85%
評：聽聞整個巴黎人都會加入法國風元素，酒店內建築和設施都會以法國建築命名，所以有劇院和海盜風水上樂園成數高。