【消委會】4招防中伏｜Local Tour貨不對辦 收到電郵不等於預約成功！
廣告
【消委會】現時大部分人去旅行都興自遊行，時間靈活又唔使夾硬去啲冇興趣嘅景點，見到有興趣嘅當地活動／景點門票就自己透過旅行社預訂。但近年關於旅遊產品或服務嘅爭議都唔少，睇睇消委會教你，遇上問題時要點解決！
撰文：Carmen｜圖片來源：消委會、網絡
消委會：旅遊服務貨不對辦 三大個案
A小姐同朋友外遊韓國，睇中一個導賞團行程，於是用某旅行社嘅手機app立即畀哂錢做網上預訂，亦收到確認電郵。明明準時而且地點正確，車上導遊都話冇佢哋預訂資料而唔畀上車。打返去旅行社，職員又前言不對後語，一時話A小姐係下一班車，一時又話導賞團已出發。A小姐最終透過旅議會成功追討賠償。
B小姐同父母去泰國自遊行，睇啱一個話由華語導遊帶住玩嘅觀光團，就立即付款報名。隨後收到旅行社通知話行程有更改，但華語導遊一項冇變，所以B小姐就冇退團。點知當日導遊全程講英文，同唔識英文嘅父母雞同鴨講。經投訴後旅行社答應全數退款。
C先生喺旅行網站買咗展覽門票，並按指示喺旅行社櫃位憑收據領取門票。但到達會場時，場內職員話展覽一早完咗。旅行社嘅收據則註明門票有效期至年尾，而且櫃位職員竟然照舊畀入場票佢，令佢非常疑惑。經投訴後方獲得退款安排跟進。
消費時應注意4點！
1｜提早／預留時間預訂
最好盡早計劃行程同預訂，為免因時間太趕令行程出錯。
2｜掌握當地旅遊訊息
留意當地服務供應商嘅辦公地點等相關聯絡資料，以便尋求協助。情況許可嘅話更建議事先聯絡當地確認詳情同預訂狀態。喺訂購當地展覽館、景點或主題樂園門票時，要上官網查清楚詳細資料。
3｜兌換安排+使用條款
畀錢前記得仔細睇返相關條款，如最低成團人數等，記低通知時間及唔成團時會點安排。雖然預訂後一般會收到確認電郵，但有時唔係確認咗就得，要睇睇條款有冇例明要帶訂單印刷本等等，仔細閱讀相關條文詳情。
4｜光顧持牌旅行社
購買服務前應先查明是否屬於香港嘅持牌旅行社，萬一出事都有途徑追討，唔好單憑有冇實體店、網上評論等而做決定。如果遇上問題，應立即電話或電郵聯絡代售旅行社，留低所有紀錄以便日後追討。
