泰國麥當勞 限定餐牌! 粉紅朱古力流心批 ~ 3大邪惡食物登場
廣告
唔知大家去旅行會唔會同記者一樣有個習慣，就係點都會搵當地嘅老麥睇吓同香港嘅餐牌有乜唔同呢？去到外地仲食麥記嘅原因好簡單，因為世界各地嘅麥當勞都會因應當地人口味而出唔同嘅餐牌。而今次記者所留意到嘅就係 泰國麥當勞 最近所出嘅餐牌！朱古力流心批、芝士粉薯條、抹茶麥旋風，我都未數仲有雞粥早餐、泰式碟頭飯……簡直令人喜出望外，勁有泰國特式，見到呢個情況，記者不禁幻想：香港麥當勞將來會唔會有機會出廣東點心或者燒味飯呢？
泰國麥當勞 邪惡美食！ 粉紅朱古力流心批
麥記嘅蘋果批受歡迎程度唔駛多講，但內餡換上朱古力流心一樣勁吸引～睇住佢帶粉紅色嘅外批脆皮配合澎湃嘅朱古力醬，成件事即刻變得勁少女，話之佢卡路里幾多，比記者遇上佢的話，一定食咗先講！而本地Food Blogger試食過，都話朱古力味夠濃郁，大家去開泰國麥記真係不妨一試，而最近適逢泰國麥記同Angry Bird合作仲轉埋包裝喎！
限定！憤怒芝士Shake Shake 薯條
最近Angry Bird 喺泰國真係Hit 爆，麥記除咗將餐點包裝換上Angry Bird之外，仲推出埋芝士味Shake Shake薯條，而同香港唔同，香港就慣用Shake Shake 袋，泰國就用上Shake Shake 盒，雖然唔知邊隻搖粉搖得均勻啲，但如果各位朋友們去到見到就試咗先喇，事關Shake Shake 薯條無論喺香港定泰國都係限定㗎嘛！
限定！憤怒抹茶雪糕
不容忽視嘅仲有同為Angry Bird系列所推出嘅同抹茶芭菲，抹茶綠襯哂Angry Bird入面搞笑嘅綠色小豬！抹茶麥旋風係以抹茶雪糕襯上Oreo曲奇粉，而抹茶芭菲就則以呍呢嗱雪糕配抹茶粉同朱古力脆餅，兩種唔同食法實滿足到抹茶迷！
除咗新出嘅Angry Bird系列餐點外，泰國麥記餐牌仲有兩款窩心食物值得推介！
早餐首選！雞絲豬肉粥
亞洲人嘅早餐大部分都習慣食熱嘢落肚，話對脾胃好啲。香港麥記就有扭扭粉熱湯粉，而泰國麥記都有熱辣辣嘅雞絲同埋豬肉白粥，加錢仲可以有埋煎蛋同油炸鬼送粥，返工前食一定勁滿足！
粥加油炸鬼呢個絕配，喺香港愈來愈難食到，如果香港麥記都引入呢個餐點，必定大受歡迎！圖片來源：泰國麥當勞官方 Instagram
泰式碟頭飯
其實香港麥記先前都有推出過晚飯系列，泰國麥記亦唔輸蝕，亦有兩款充滿泰國風情嘅碟頭飯畀大家選擇，分別為九層塔炒雞肉飯同埋青檸辣雞飯，切合當地人口味！
