尖叫實錄| 2秒直插 沖廁滑梯 !!!! 芭堤雅必玩最新水上活動
撰文：阿妹 | 圖片：Hong
上樓梯之際，震耳欲聾的慘叫聲此起彼落，嚇到Model Kate一度要玩拖字訣！她終於扚起心肝步入玻璃箱，救生員二話不說便將門關上，勁爽手！啟動裝置後，電腦女聲隨即倒數，Model一聽到two便嚇到喪叫，然後，下一秒經已「砰」一聲消失，由於是正宗Free fall，玩時更會與靠背完全分離，全程快過2秒，著地一刻的摩擦力超強，除了眼耳口鼻勁入水，就連泳褲都不慎走位！排隊期間，有少女在玻璃箱嚇到喊，真正喊住玩，好壯觀！
沖廁滑梯 直落free fall 驚嚇度爆登！
沖廁滑梯 共有2條，分別是2秒直插的橙色滑水道及5秒360度旋轉的藍色滑水道，橙色一定最刺激！
亡命直擊！
玩時必須雙手雙腳呈交叉狀，上背緊靠水道。 沖廁滑梯 Free fall過程不足2秒，快到攝影師都捕捉唔到Model英姿。
玩後感：兩種驚恐嚇破膽！
驚嚇度：★★★★★
入玻璃箱跟正式玩其實係兩種驚嚇，前者係等死；後者係凌空極速撻落滑水道，好似跳樓咁！玩完 沖廁滑梯 再玩其他slide，立即覺得好濕碎！
TIPS：閒日慢慢玩！
當地人多數在周末入場玩水，想有充足時間玩slide，閒日去最穩陣！
特大水管滑水梯 激彈3米
講離心力，除了沖廁滑梯 ，Aquaconda一樣冇得輸，看似平平無奇的蛇形滑水梯，特別加設兩個特大水管於出入口附近，刺激度大增！Model Kate坐上水泡艇後出發，滑過兩個270度大彎後，便會先經過一個中型水管，隨即45度俯衝到大水管滑梯，強勁衝擊力令成隻艇幾乎跣到大水管頂部，失驚無神的離力心令Model尖叫到失聲！不過，一波未平一波又起，緊接下來的回彈力，令水泡艇跣到大水管的另一端，期間更激起大量水花，Model更加瘋狂飲水！正當Model喘幾口氣，又即將進入另一大水管，她再次被拋到6米高管頂，全程拋來拋去，尖叫聲由頭帶到落尾！
咆哮錄播！
玩後感：超強離心力！
驚嚇度：★★★☆
玩畢全程約30秒，冇諗過咁勁離心力，尤其係經過大水管，真係跣到頭都暈！
BB級 溫和洗衫板
據救生員所講，出名平和溫順的泰國人，對驚險刺激的滑水梯並不熱衷，因此園內不少滑梯都會貼近當地人口味，其中經典玩意洗衫板Boomerango便是代表作！目測所見，板的高度不過10米，垂直角度約80度，與正宗90度角Boomerango有出入，不過玩家一樣玩到依嘩鬼叫！坐上兩人一艘的水泡艇，沿途盡是密不透光的水管，大約8秒後重見天日，隨即而來的是45度俯衝而下，強勁衝擊力令水泡艇衝上洗衫板，然後再直插落水！雖然角度、速度及高度都打了折扣，算得上是BB級洗衫板，但不少local玩家仍然大呼刺激，仲話離心力強勁，膽小玩家不妨一試！
俄羅斯Sally及妹妹玩後感：直上直落好驚喜！
驚嚇度：★★★☆
水管開頭黑麻麻，感覺好刺激，點知一見光就跣到最低處，然後再垂直衝上板端，感覺好似飛天咁！
泰味濃郁Waterpark！
佔地超過18萬平方米的園區，加加埋埋共50個checkpoint，滑水梯以外，大家最關心當然係餐廳及園內設施，勢估唔到園內由食物到休閒設施都極具泰國風情，當中嬉水區Aqua Play的泰式圖騰裝置就最重手，相信小朋友係唔會介意嘅！
勁食泰菜
園區共有4間餐廳，最有睇頭都係LakeRestaurant，餐廳有小量中餐及西餐供應，不過最多人柯打必定是泰菜，辣到嘴巴麻痺的冬蔭功及酸酸甜甜的泰式炒河都令人愈食愈開胃，好醒神！
蝦肉泰式炒河 THB175 / HK$38
冬蔭功THB195 / HK$43
小學雞天堂
園區小量超激玩意如沖廁滑梯，會將身高不達1.2米的小朋友拒諸門外，因此小朋友可以轉戰到水上樂園Aqua Play，裡頭有多條小型滑梯及水槍，離地4米的大水筒每隔5分鐘便會倒水，水力猛到連model都跪低，小朋友梗係嚇到爆喊！
歎住回氣
食完午餐難免飯氣攻心， 必須要唞，講到歎呢方面，場內更設泰國按腳及全身按摩，師傅不論手勢、力度都出奇地好！前提係你唔怕人來人往會尷尬的話，值得一試。
RamaYana Water Park
地址： 9 Moo 7, Sub District of Na Jomtien Sattahip,ChonburiPattaya（顯示地圖）
電話：+66（ 0） 3300 5929
營業時間：10am-6pm
入場費：THB990 / HK$217（成人）、THB790 / HK$174（小童）
交通： 設穿梭巴士往返酒店及園區，一人每程約THB120 / HK$26。（必須於入場前一日，晚上7時前預訂）
備註： 坊間有旅行團於7月出發前往RamaYanaWater Park玩水，價錢3千蚊起跳，詳情可
查詢星晨旅遊（2519 8088）。
網址： www.ramayanawaterpark.com
