歐洲驚現「港式車仔檔」！布拉格鬼仔賣熱辣辣廣東點心
廣告
如果揀一樣最具代表性兼最地道嘅香港美食，揀廣東點心應該無乜人反對！近來，一位捷克廚師更深深地被香港嘅「一盎兩件」吸引住，早前就喺布拉格嘅街頭發起咗個點心車快閃活動，為期兩日，旨在帶呢款香港美食畀當地人一試，而嚟緊仲會去唔同餐廳做個「點心巡禮」！呢個快閃活動不禁令記者回憶起舊時喺酒樓，都係喺部點心車前篤點心……唔知香港地嘅酒樓又會唔會學似人哋外國咁，保留返屬於廣東文化嘅點心車呢？
睇捷克廚師蒸起點心嚟都有板有眼㗎，真係忍唔住要講句：「真係食過夜粥」喎！
我哋平日去酒樓食點心就配壺中國茶，傳到嚟外國就配餐酒，呢次真係體現咗中西文化交匯呀！
如果以快閃活動嚟講，今次呢個pop up 點心車活動提供嘅點心款式都唔算少。睇返以下嘅官方餐單，唔同餡料兼唔同做法嘅餃子，佢哋就統稱為點心（Dim Sum），有豬肉、鴨肉、吞拿魚、火雞等等都有揀，另外，仲有港人至Like嘅叉燒包、蝦腸同馬拉糕都有，雖然賣相同做法唔同咗，但佢哋亦跟足廣東「一盅兩件」嘅擺法，每盅點心只有兩件！
