機票入手全攻略 曼谷11月$750 即飛！
廣告
既然係時候重返 曼谷 懷抱，梗係要格吓價先出發啦！ 曼谷 機票比其他航點相對冇咁浮動，主要航空公司價錢企得幾硬。廉航HK Express將於10月尾停飛 曼谷 ，得返AirAsia一間，除非預早大半年買，否則唔係平好多。冷門航空班次時間唔吸引，似乎搭傳統航空較穩陣。
數據點樣嚟?
由窮遊大學生 Alfred 同友人主理，自2012年成立的格價網，每日守株待兔轉發劈價資訊，資料來源包括航空公司網站及討論區，數據庫儲落價格資訊超過2萬條，網站更收錄「教科書式」機票比拼。
ROUND 2 曼谷 航班逐個秤
三間航空公司班次最密為國泰，價錢亦最貴，基本上只有常客先會考慮。泰航口碑唔差，而且有30kg行李，shopping掃貨唔使憂，不過優惠價只做到24/10。香港航空班次唔錯，價錢又抵，而家買11月有不少$750飛，好過買廉航！
Alfred 點睇：港航性價比高！
香港航空官網有個「一click即享」的長期優惠，只要45日前買飛即可平，長期做$1,200起，淡季更有望跌破一千！港航班次多，時間易揀包埋行李餐飲，絕對抵買。
ROUND 3 撲平飛部署大計
唔揀以上航空公司，仲有好幾條線都經 曼谷 ，但班次極疏，如肯亞航空一星期只有三班，勝在旺季都唔起價。AirAsia亦冇著數，而家買11月要 $1,300以上，唔係Big Sale唔使考慮！
善用折扣代碼：
官網死都唔減，惟有由其他旅遊網站入手！Hutchgo、Zuji 等不時推出折扣代碼，減$200-$250，慳慳埋埋可以食到一兩餐。
紅日揀冷門航空：
真係要揀旺季出發，惟有選擇冷門航空公司如肯亞、斯里蘭卡、暹羅或約旦航空，有機會正價$1,500至$2,000入手，唔使捱無理貴價。
捕實開倉：
AirAsia Big Sale可以減到好癲，曾經試過推出免費機票，出年3-10月出發$340連稅。大前提係要九個月至一年後先出發，要承受到時去唔去到的風險。
