實測東京UberEATS，500円外賣小鮮肉送上門
採訪：yuki@港女講旅行 攝影：yuki@港女講旅行、相關機構
不設最低消費！￥500即送
發佈會宣布推出外賣服務東京UberEATS，合作餐廳有超過150間，當中更包括米芝蓮廚師主理的餐廳。同時更公布新開優惠，每間餐廳會在即日至10月29日期間，分別提供一款特定的￥500/HK$38優惠菜式。值得留意的是程式不設最低消費，即是40蚊唔使，就有人送食物上門。加上程式已預設中文，以後去東京旅行，就唔怕因為唔識日文，硬食酒店貴價room service啦！
唔使等！1小時內即送到
發佈會有專人安排，試食的食物自然有返咁上下水準。所以港女記者一返到涉谷的酒店，立即在房內落單開餐──叫外賣！按住我的所在地搜索，不同時段都只有十數間餐廳提供外賣，選擇不多，不過日本是永遠不會令人失望的！！由落單到送到酒店門口，都唔使一個鐘！雖然送上門的外賣員唔及發佈會上的小鮮肉靚仔，但講食物質素和外賣包裝拍得住堂食，拎上手熱辣辣！記者仲試埋只賣￥500的士多啤梨pancake，完全無偷工減料，與正價的份量一樣，鬆餅又香又軟，坐在酒店房就有得食，好幸福啊！
必睇實測報告
實測1：港女至like！必食Pancake
實測餐廳：Daikanyama Pancake Cafe Clover’s
送貨時間：45mins
港女一向至愛食甜品，所以見到連Pancake都可以外賣相當驚喜，急不及待即刻柯打！打開門時見到外賣員身水身汗，細問之下才知道他主要靠踩單車送貨，擔心慕絲溶化，更專登踩快兩步，難怪入口跟堂食分別不大啦！
實測2：大滿足！和食外賣夠精致
實測餐廳：大戸屋ごはん処
送貨時間：40mins
以為會菜、汁、飯、餸撈埋一堆咁唔開胃？我從紙袋一拿出燒魚和炸雞便當，賣相已經令人食慾大增。惣菜、主菜和飯分開擺，便當盒上更用膠紙貼上濕紙巾、筷子、醬油，見微知著便知日本人對外賣亦相當用心認真。
（使用教學睇埋下頁！）
總評：懶病大發時必試！
程式剛起步，餐廳數量不算多，好在款式都叫多元化，日本、新加坡、印度、意大利菜等都有，但記者最愛的壽司、拉麵暫時未見影。而且以外賣的質素而高，絕對是超班的！因為所有餐單都經過日本主廚決定，全部菜式都適合送外賣，不會影響質素！加上在10月有 ￥500優惠，絕對試得過。
