東京機票入手全攻略 達美$2,600必搶！
廣告
東京作為長期熱賣目的地之一，票價高企，想買平飛唔容易。今期先解構傳統航空，三大航空公司以外，早前以超低價作賣點的埃塞俄比亞航空，暫時只營運到10月24日，好彩有達美回歸，同樣筍價買到東京機票，有驚喜！
數據點樣嚟?
東京航班逐個秤
國泰價錢貴、得一件行李已經輸蝕，只有班次密、飛羽田時間最靚，以及回程可以open jaw三大優勢。每個月一次fanfares鐵價賣$2,390，仲要爭崩頭先搶到。日航平均每三、四個月會推出優惠，最平可以$2,400入手，比起只做不定期優惠的全日空更易買。達美將於10月26日重開成田線，11月check到最平$2,008，基本上冇得輸！
Alfred 點睇:首選達美!
撲平飛點部署?
雖然機票價格企硬，不過想買減價機票都唔係冇可能，曾經試過淡季撲到日航$2,430機票，唔使凌晨同人爭，真係抵到爛！傳統航空買平飛，揀啱時間最緊要！有假期，仲可以考慮轉機，一票玩兩地更划算。
吼實日航 big sale
日航每年有三至四次大劈價！出發日期約半年後，時間及日子選擇多，對上一次減價為六月，睇嚟好快又有新一輪劈價，唔好錯過。
睇櫻花要早買
日本櫻花季由三月至四月，連埋復活節及清明假期，價錢會略高，要賞花請早啲買飛。 紅葉季約10至11月，仍算淡季，反而唔算貴好多。
台北轉機
長榮及華航都可以經台北轉機到東京，華航駁機時間較佳，長榮則較平，價錢$2,350起，回程可作雙城遊。
