曼谷Avani Riverside $1,500有找住總統級套房

Sep 30 2016

今年4月新開幕、仍在Soft Opening的曼谷Avani Riverside Hotel河畔酒店，設施齊備之餘，服務貼心先係俘虜人心的王道，有Bell Boy 幫手拎行李上客房，安坐11樓的空中大堂梳化就有專人服侍Check In，簡直媲美Resort 服務！最重要係個景超正，無敵曼谷河景Infinity Pool，是去泰國旅行最新好選擇！

Text:Perfect Hill完美山 | Photo: Chi

曼谷Avani 天堂一游　Skyline 做背景

酒店是名牌Anantara 的副線，員工服務貼心有保證之餘，最吸引是位於26樓的天台無邊泳池！平日在海邊的Infinity pool 游得多，今次在離地60米的泳池游水時，游到盡頭，感覺竟似游向藍天！少了屏風樓的遮擋，眼下是蜿蜒曲折的湄公河，當我沉醉在半空時，兩位姊妹已抓緊機會，穿上比堅尼，用曼谷繁華的Skyline 作背景，互相幫大家影水著相呃Like！天台泳池不單是閨密影相位，我見不少情侶都愛在另一邊的按摩池，一邊浸水一邊留倩影，眼冤，好彩我都有兩個閨密喺身邊啫！

600呎套房　人均$682！

今次想對自己好啲，沒有選擇酒店的入門級客房，反而膽粗粗訂了600呎的河景套房，180度大玻璃窗對正湄公河，視野開揚之外，房間大到放兩張Queen Size 床、1張梳化，行李打開亂放都有位剩，叫多4個女友住都冇問題！姊妹Isabella 話最抵讚是個洗手間，有兩個洗手盆同超多鏡，完全不怕爭位化妝而鬧交。Winnie 就話大浴缸是加分位，可以做啲平時唔敢做的事，我心諗：我守身如玉㗎！原來她指的是浸泡泡浴，平日在彈丸之地的香港屋企只得企缸，今次放假就可以睇住河景浸返夠本，抒解日日著高踭鞋的疲勞。加上房租只是每晚約HK$1,300，2人夾都只是$682一個，超抵！