日本制霸︰冬天唔爆拆4招美肌日本妹沖涼豆知識

Nov 18 2016

皮膚乾燥爆拆到身痕未？入冬後，油脂分泌少，唔止塊面甩皮，全身都太乾燥，痕到爆。原來皮膚乾燥，好多時係因為你唔識沖涼！一向要靚唔要命的日本妹，沖涼保養做足功夫，咁啱邊沖涼邊睇到《世界一受けたい授業》日本冷知識節目，搵來温泉療法専門醫師早坂信哉，講冬天沖涼豆知識，聽完發現一直以來，大家沖涼的方法都係錯！

温泉療法専門醫師早坂信哉教路︰4招入浴美肌法

#01 飲杯綠茶先沖涼

綠茶所含的茶單寧有美肌效果，有實驗證明飲完杯綠茶先去沖涼浸浴，身體能吸收的茶單寧高7倍！醫師話，飲杯綠茶先沖涼，皮膚會靚好多。

#02 浸二手浴

爭先行頭慘過敗家，原來搶先浸浴乃大忌，皮膚會dry到爆。點解？因為水喉水係會加入有氯（塩素，Chlorine）來消毒，而氯會把表層油脂洗去，皮膚唔乾到爆就奇。人體的皮脂（蛋白質及脂肪）是可以消除氯，所以首輪浸或者用花灑沖涼，皮膚會特別乾燥，原來浸二手湯先係好！不過若你怕泡二手湯唔衛生，那加入柚子、果皮或一匙檸檬汁（維他命C）入水中，其實都有保濕的效果。

實驗證明︰浸二手浴比第一泡浸，皮膚狀態好好多! (圖片︰世界一受けたい授業)