日本制霸：龍友末日 京都紅葉名所 禁止拍照

京都每年都會吸引過百萬人去觀賞紅葉，人多就煩，唔止人迫人，間中可以見到外國人為自拍而攀樹爬高扯樹葉，唔單止破壞景點，仲為自己及他人帶來危險。當地景點如清水寺等禁用腳架影相已不是新鮮事，今年再下一城，如東福寺就在指定日子(11月12至30日)，禁止在寺中的天橋、臥雲橋使用腳架、手提電話、相機又或自拍棍拍攝，雖則大條道理驚在橋上影相有危險 (怕人擠人、墮橋云云)，但當地其他紅葉景點也爭相仿傚，借機整頓觀光客的禮儀。

場內攝影禁止︰大德寺黃梅院、飛雲閣、醍醐寺三寶院、大德寺大仙院、曼殊院門跡、地藏院、源光庵、寶泉院

部分地方禁止拍攝︰上賀茂神社、岩倉實相院

幾乎年年都會到京都為紅葉取材，老實講，好多寺廟其實平日只供善信入內參拜，只是在櫻期、紅葉期間作有限度開放。清靜之地，一下子湧來大量遊客，有時仲為爭位問題而爭拗，確實為當地人帶來困擾，畢竟寺廟本身不是觀光地，兩相取捨，有些小的寺廟索性閉門不開。

你不仁我不義，決定攬炒嘅京都人果然夠狠，不單是外國人，就連當地日本人都包括在整頓範圍內。。實行禁拍令，大家不用再在紅葉景點為打龍爭位磨爛蓆。

不過有日本網民提出，禁拍令很難在人流很多的時候執行，即使有人無視規距偷拍，難道管理人員可以即時出來趕人？禁拍令，其實都是靠自律及群眾壓力來阻嚇，大家都係專心睇，在回憶中打卡，唔好佗衰家再令當地人反感啦！