旅遊中伏 ！騙徒直撥酒店房套信用卡資料 受害人大踢爆

Text：Venus@天才女行社 | Photo：新傳媒資料室

個案01 | Check-in後房中電話響 扮酒店前台職員套料！

不少酒店Check-in時要用信用卡留按金，竟然成為騙徒呃人謊言。有網友K分享慘痛經歷，話自己在酒店櫃枱用信用卡順利Check-in，上到房不久收到房內電話，有人自稱櫃枱職員，話剛才留按金的程序出了問題，要求佢再次提供信用卡號碼及CV Code確認。實情是騙徒於酒店Check-in高峰時間以外線打入酒店房呃人。由於是房內電話，真實感大增。而且騙徒非常專業，語氣似到十足十，唔似得香港早排常有不明電話通知你有家人被公安捉咗，把聲又有鄉音又嘈雜咁。結果事主信咗，自動提供晒資料俾人任用。

疑點01 | 酒店會用電話問資料？

一般情況下，酒店不會要你在電話中提供相關資料。如果有，都係酒店唔專業。所以，如果收到類似電話應該收線，再致電櫃枱詢問，最好直接落大堂問清楚。

疑點02 | 未碌按金Check-in到嗎？

再者，如果Check-in 當下未能成功以信用卡留按金，根本不會成功拿到鎖匙上房。記者上次到澳門某酒店公幹都用了信用卡Check-in，結果刷了兩次卡都未能成功，原來是磁帶太舊，搞咗一大輪，總之唔得唔會放行，最後要改用現金按金。

個案02 | Express Check-out疑被偷資料？

網友X分享上個月入住澳門某酒店，貪方便用Express Check-out服務，之後懷疑因而資料外洩。所謂Express Check-out，宜家好多酒店匙卡都會夾住一張小表格，俾你填寫全名、信用卡資料（不包括CV Code），Check-out時就將表格連匙卡放入大堂的特定箱內，咁就走得，無須去櫃枱排隊，有咩費用會直接扣數。網友X指，Check-out翌日凌晨即收到信用卡短訊通知，指有一筆$900美金可疑款項交易，由於相當不尋常，按程序已中止交易及凍結信用卡，好彩就無損失，係要換過張新卡麻煩少少。雖事件發生時間相近，但信用卡中心指調查不到是否因為Express Check-out導致資料外洩。

破解03 | 懷疑被盜用信用卡該怎辦？

資料外洩有許多原因，如果在外地用了Express Check-out或任何信用卡交易，就只好更為小心。其實外國處理信用卡方法更成熟，在餐廳碌卡更會在客人面前過數，不會隨便被人取走信用卡。好多人去外遊就
「不理世事」關電話，其實最好用漫遊或Wi-fi上網定時檢查信用卡用款情況是否相符，或留意有否收到信用卡中心電郵或短訊通知。如果發現可疑情況，應立即致電信用卡中心凍結戶口。