去旅行計到盡！ 訂酒店 慳錢法則 @杜遊珍

撰文：杜遊珍 | 相片：新傳媒資料室、網上截圖

訂酒店 3大網站心得

如果有得慳嘅地方你唔慳，你咪蠢囉！就好似早排有傳媒教用 訂酒店 網站的「安心價格保證」，賺差價慳到盡，就引來極大迴響，有人鬧爆記者教唆人明知Book 貴咗都要Book， 又話搵人哋公司笨唔值得推廣，不過亦有人支持呢個「扣減雙倍差額」方案係白紙黑字列明的著數，唔用先係蠢。兩睇啦，你估該網站唔知呢個所謂漏洞咩？阿珍我都算機關算盡，等我分享以下三大網站的訂平房心得：

01.Expedia－雙倍奉還價格保證

網上較大型的酒店網都有價格保證，即係同一入住條件下（如日期、房型、包早餐、取消政策等），若你搵到其他網站仲平啲，會退還差額，當中Expedia講明雙倍奉還，最多退$800，都算多。

細則好嚴苛，如價格保證只限交易後24小時內，仲要截圖證明，再填表格申請退款，網站顧問仲會電郵跟進數次，才會退回差價，手續繁複。

02. Agoda－電腦Check完用App訂

阿珍試過喺Agoda check酒店格價，點知同一間酒店竟然愈查愈貴，搞到好似就快被人訂晒咁款，最終用手機開app再check，仲平過網頁價格！其實好多網頁都有暗中紀錄你的查詢，如果房價突然飆升，不妨轉用手機！

雖然要裝多個App嘥memory，但Agoda個App有時又會有額外優惠，房價更實惠。

03. Hotels.com－記得做會員

入咗會有勁多優惠：一，會員價比街客平少少，而且訂房次數多可以升級會籍，更早收到優惠；二，會員住10晚送1晚，免費當晚的房值相等於以上10晚房價嘅平均數，變相9折左右囉！

10送1嗰晚唔係間間酒店適用，但幫人訂房住咗都計，我推介過畀好多秘書姊妹㗎！