超準！旅行心理測驗｜出遊只準帶一樣物品 反映與你最夾的旅伴個性

帶一種物品 選出最夾旅伴

出發去旅行前，執行李除了錢、手機、護照等必需品外，只可以再帶一樣物件的話，以下5種你會揀哪一種呢？

A. 啤牌、大富翁等桌遊

B. 藥物、急救包

C. 最喜歡的公仔

D. 耳機

E. 旅遊書

A. 啤牌、大富翁等桌遊 活力型旅伴

天生怕悶同無聊的你，就算去旅行都會玩盡一分一秒，盡情投入於旅行之中，就算日頭已經玩咗成日，夜晚都會想同朋友仔一齊繼續玩。因此，你最適合同一大班朋友一齊去旅行，充滿活力而又搞笑的朋友，玩足全日都唔怕攰就最夾啦！

B. 藥物、急救包 謹慎型旅伴

你係一個天生比較謹慎小心的人，同時亦會有較多顧慮，所以每次去旅行前，你都一定會先做好萬全準備，以防萬一。因此，你需要一個非常謹慎小心的旅伴，所有事都會double check 一次，行程期間亦可以做到on schedule，會比較令你放心。

C. 最喜歡的公仔 成熟型旅伴

你性格比較會依賴，好多時候都猶疑，好難自己做決定，需要問其他人意見，而遇上問題、困難的話，你更加好需要有人支持、幫助。因此，你會比較適合同長輩、家人，又或者心智比較成熟，有決斷力的朋友一齊去旅行，可以隨時隨地幫你做決定！

D. 耳機 獨立型旅伴

你的個性比較獨立，經常自己一個拖住行李快閃，熱愛自由。同時你亦係一個重視個人空間的人，喜歡思考、擅長觀察四周、相比之下，你其實更適合自己一個人去旅行。如果一定要有旅伴同遊的話，可以挑選比較獨立自主的朋友，不會事事依賴你，中間有啲時間可以分開玩會更好。

E. 旅遊書 分享型旅伴

你不喜歡無計劃的旅行，每一次出遊都會做很多資料搜集，仔細地plan 好每一個行程景點，同時也很喜歡聽別人的想法、參考他人意見。因此，你的旅伴最好是一個有責任心的人，可以與你一起討論行程、聆聽對方的意見，旅行期間不停互相討論分享，可以令你更加滿足。