新科技! 日本地鐵充電神器 |名古屋|
廣告
依家啲手機真係愈嚟愈快冇電，雖然會帶充電器出街，但有時都係唔夠用。事關朋友圈中，總有一兩個成日唔帶外攜式充電器，但冇電就周圍問人借電嘅朋友⋯⋯其實嗰刻就唔係咁想認佢做朋友，自己都得返10%電，點借俾你呀？如果唔想人見人憎，除咗出門記得帶充電器，或者可以學下呢班日本學生，研究點樣利用地鐵車廂扶手充電。
平日被標榜為低頭族嘅電話用家，依家可以光明正大改名做仰頭族。名古屋有班大學生研究喺地鐵車廂充電，成部電話插喺扶手吊環上面，不但止可以堅握扶手，只要昂高頭，仲可以睇片、WhatsApp、上網樣樣得，既安全又方便。雖然依家仲係測試階段，但政府非常鼓勵呢班學生研究落去，相信經過改良，日後可以通行全國，惠及其他地區。
留意返，坐低係冇得充電㗎！或者香港地鐵都應該研發下呢啲新科技，到時可能連關愛座都唔需要標示，讓座文化更加普及。但充電之餘記得落車，唔係趕得濟留咗部機喺車，或者拆爛個扶手環就唔好啦。不過呢個玩意就唔太適合重視私隱嘅朋友仔，放到咁高，隔離左右睇得一清二楚。
