唔方便嗰幾日潛水得唔得？港女 斐濟潛鯊 零距離selfie
採訪：Yuki@港女講旅行 攝影：黃家活、Yuki@港女講旅行
M Come睇鯊得唔得？
聽過好多新手女潛友都會問，M Come可唔可以潛水？仲要潛鯊，會不會有危險？其實是絕對OK的，不過我個人唔想旅行或者落水時不方便，會預早一星期搵醫生拎荷爾蒙藥延遲經期，食到潛完先停藥，成功率都有8、9成。不過心血來潮話唔定，又或者唔想食藥的，很多女潛友都會選擇用棉條，加上水底有水壓，雙重保險唔怕有滲漏。
不過話晒咁大個女，淨係試過隔住個mon同水族館玻璃睇過鯊魚，第一次在斐濟潛水睇鯊就要越級挑戰──無鐵牢隔住、零距離睇！雖則我生得細細粒粒無肉食，但都超級忐忑，更擔心連食藥都無用，一陣血染海底，引誘鯊魚大哥咪死！聽聞鯊魚在老遠就會聞到血腥味，但原來很多測試都證實，牠們聞到人血不會變得有攻擊性，甚至當人無到。比起人，其實魚先至係鯊魚最愛的大餐！
腳震震！跪拜斐濟鯊
不過又食藥，又棉條咁麻煩，其實都係為了睇一次鯊魚大軍啫！斐濟納迪港（Nadi）對出的Shark Reef Marine Reserve潛點，出名可以睇勻8款鯊魚品種，全球獨有！我專登上網查過我幫襯嘅潛鯊公司，營辦近廿年標榜完全零意外，仲確認了超過十次，死就死啦！朝早坐快艇出發，大概40分鐘就到！第一次下潛就落30米深，我眼都不眨望住海底，驚死鯊魚好似電影中突然游至。待同行20名潛友一字排開跪在礁石背後，餵鯊員立即打開裝滿豐盛美食的「垃圾桶」，我連喘息的機會都未有，主角就出場了。
近廿條超過一米長的公牛鯊聞食物而至，同時亦有體型較小的礁鯊和一群色彩斑斕的魚群，目測超過半百條巨魚在我們眼前亂舞。我們全程都不敢亂郁，屏息靜氣望住帶上安全裝備的餵鯊員手持一塊塊魚肉，餵到鯊魚口邊。食完一啖，牠們會輕輕游開，有些會剛好掠過我的頭頂，牠們的血盤大口只有兩個手臂的距離，每次游近我都忍唔住閉氣以免被發現，諗返起仲以為遇到疆屍！
馭鯊有術！我見過最勇猛嘅男人
第2潛，我們在15米水底留40分鐘，有了經驗個心淡定得多，我仲開始留意全程在我後方、手持一支長鐵鈎為我護駕的幾位斐濟猛男，個個身形勁過香港先生，好有安全感！仲有一位走在餵鯊最前線的潛導Serevasio， 用身體吊住魚餌「垃圾桶」，一打開蓋就引到班鯊魚乖乖聽話埋身；有時他更徒手拿出魚塊，放在巨鯊嘴邊餵飼，認真未死過。
上水後好奇問他，原來N 年前第一次落水時跟我一樣驚青，不過同鯊魚日見夜見，一星期潛足5日，自然friend 過band！偶然遇上初來甫到的新鯊魚，猛撞「垃圾桶」等唔切被餵，撞到成頭傷晒㖭。佢仲即場開電話裡的鯊魚相：「唔係寵物，而係同朋友一樣，點見都唔悶！我哋仲可以認得每一隻，好多都有改花名！」等我望真啲！條條都好似一樣樣嘅喂，真係斐濟人先認得出！
險過剃頭！挑戰水底selfie
叫得港女記者，當然要做港女必做的事！水底打卡，我就做唔到嘞！但見生長在保護區內的野生鯊「本性善良」，攻擊性又不高，被餵得肥肥白白， 記者愈來愈大膽， 挑戰水底 selfie 與鯊自拍。不過影還影，我都記住潛導落水前的提醒，千祈唔好伸長手臂！影完一張，即刻縮返埋隻手！話口未完，又有2、30條公牛鯊和黑尾真鯊殺到埋身。今次淡定慢慢睇，發現牠們從餵鯊員手中食完一啖，又會蠱蠱惑惑u-turn 再食一次，好鬼為食。
以為已經見得夠多鯊魚，滿載而歸？點知潛導事後話我們所見的只是碎料，高峰期可以一潛看到超過 70條，見到巨型虎鯊才是最幸運。不過計我話最幸運嘅係，上水之後突然見到攝記大哥一臉鼻血，回想起他在水底一身血腥跪在我身邊，感覺就似執返條命仔！好在斐濟鯊魚真係鍾意食魚多過食人！連佢都話執返身彩， 全程有當地潛鯊員帶實，先至可以一臉血，一邊淡淡定咁影相交差。
斐濟追鯊最出名！
潛鯊位置： 著名潛點Beqa Lagoon位於斐濟南部，可碰到公牛鯊、虎鯊、黑鰭鯊、護士鯊等8個品種。
潛鯊過程： 兩潛各40分鐘，第一潛會先到30米睇鯊，再上升至10米近距離欣賞餵食礁鯊；休息1小時後，第二潛到15米。
最佳季節： 潛鯊團全年開辦，不過 5-9月是潛鯊最佳季節，見鯊數量最多，能見度亦最遠。
Info
Beqa Adventure Diver
地址：Lagoon Resort, Pacific Harbor, Fiji
電話：+679（0）345-0911
價錢：潛鯊2潛FJD325/HK$1,227（逢星期一、二、四、五及六），租全套裝備另加FJD50/HK$189
營業時間：8am-4:30pm
網址：fijisharkdive.com
斐濟實用資料
簽證： 持BNO及特區護照均可免簽證逗留4個月
貨幣： FJ$1兌換HK$4.4，可以港幣於當地機場直接兌換
天氣： 6至10月是溫度較低的乾季，雨量少，平均20-28˚C，屬旅遊的最佳月份；11至5月是風季，雨量較
多，平均溫度約23-32˚C
機票推介： 斐濟航空每周有四班往來香港至斐濟的航班，在10月31日前訂購11月20日前出發的機票，來回只需HK$4,680起！網址：fijiairways.com
