挑戰長隆 3大傳奇鬼屋！澳門市民獨家8折！@Travel佳

Oct 19 2016

(Presented by長隆海洋王國)

又到一年一度試膽萬聖月，各大小商場已經充斥住唔同主題嘅鬼屋，我Travel佳呢幾個星期一直以挑戰鬼屋為頭號消遣活動，今日又有新推介俾大家，就係長隆海洋王國重金開發嘅萬聖節專區，唔止玩法新鮮刺激，仲有激筍優惠益澳門朋友，想知係咩就繼續睇落去！

萬聖節重本力作

長隆海洋王國今年特別隆重其事，專程開發咗個Halloween專區「橫琴碼頭」。專區以海上鬼怪故事為主題，裡面3間鬼屋分別以「逃」、「死海尋寶」同「靈號倉庫」命名，齋聽個名都覺得陰森恐怖。今次另一特點係除咗互動場景之外，仲加入VR虛擬實境技術，逼真度同刺激感即時升級十倍，入場前真係要做好心理準備。

「逃」出生天

海盜加驚濤駭浪再加漆黑一片最易發生咩事？無錯，係靈異事件！率先要同大家介紹嘅「逃」鬼屋以沉船為主題，呢度total有10個場景，一班專業演員嘅演出同燈光已經營造到個氣氛好緊張，一路行仲要一路聽住地板發出嘅「吱吱」聲，搞到成個人身心俱寒，加上海浪效果、互動場景呢類體驗，好似一次過經歷晒古老沉船上可能出現嘅詭異情節咁。

虛擬實境「死海尋寶」

跟住要講嘅鬼屋「死海尋寶」主打高科技感官體驗，透過VR虛擬實境，大家可以全方位冇死角咁探索惡名昭彰嘅猛鬼郵輪，每一下頭部轉動都會觸發唔同嘅畫面、聲音、同震動，呢種睇得見但摸唔到又避不過嘅感覺，實在令人步步驚心。

魅幻「靈號倉庫」

3間鬼屋中以「靈號倉庫」最科幻神秘，倉庫入面收集咗各式各樣嘅深海怪獸標本，穿過實驗室、解剖室會見到好多受病毒感染嘅工作人員同怪形怪相嘅變種異型生物，仲有充滿科幻感嘅時光隧道、鏡迷宮同大型機械特效，感覺愈行愈迷失，好似親身經歷緊生化危機嘅情節咁。

暗黑派對

除咗3大鬼屋，橫琴碼頭仲會大搞Halloween Party，現場有成班鬼怪一齊玩一齊癲，仲有南瓜、海盜、骷髏造型等主題Selfie Point，當然唔少得免費鬼妝服務，大家可以齊齊變妝成嘩鬼，盡情投入愈夜愈精彩嘅鬼魅世界。

澳門人必知！

咪話我淨係識關照香港朋友，今次呢個著數係專為澳門居民而設。由而家起至11月6日，萬聖節專區會喺指定日子夜場時段開放，澳門市民出示澳門身份證就可以8折現場購買即日夜場門票，特價日同正價日門票折咗分別只係RMB160同RMB200咋，每人每日仲可以買8張門票咁多，一班人去真係好抵玩，各位澳門朋友買飛時記得Show身份證呀！

非澳門居民都唔洗失望，事關10月21至25日有Ladies’ Night優惠，女士們入場只需要RMB99，無論現場定係網上購票都係呢口價㗎！

溫提埋大家，夜場時段可以玩足7個鐘，識玩一定喺4pm至8pm呢段時間玩盡海洋王國嘅園內設施，留返8pm至11pm先玩鬼屋同參加Halloween Party，咁就最善用門票喇！