的士餐廳bell boy小費逐樣計 3個有用App幫你計如何畀貼士

Feb 1 2017

作為港女人版，我在香港畀貼士一直奉行「加一收費，貼士咪制」的策略，明碼實價唔使計又唔使煩，可惜人在外地，入鄉隨俗要記住幾時畀18%貼士、幾時畀散紙的確好煩，尤其是去美國，畀少咗個崩那塊面真係黑過墨汁，所以我一定袋住有用的App幫手計Tips！

文：杜遊珍

小費逐樣計貼士三級制

去過咁多地方，美國對貼士嘅堅持就真係令人費解，你有冇諗過，買杯Starbucks、食個漢堡包都expect你畀小費？美帝國度裡，上餐廳時，15/18/20%三級制貼士是常態，好彩帳單會幫你計埋讓你隨心畀貼士，唔好彩就要即刻計。在酒店，要畀貼士嘅情況更多，一般要向Porter畀每件行李US$1、清潔的阿姐每晚畀US$2-$5貼士，如果搵Concierge幫你訂位食飯，亦最好付US$20打賞。話時話，原來美國之所以流行畀貼士，因為好多侍應無底薪或者刻薄老闆預咗侍應會收到貼士，所以去美國的話，各位就當予人方便，服務唔太差，記得畀貼士！

美國的士佬貼士暗搶錢

在沒有Apple pay的年代，無散銀旁身搭的士，幾乎係死路一條。話說當年阿珍第一次去紐約，坐的士去機場又沒有散銀，冇畀貼士，司機當場發爛，竟說貼士可以找續，我當然睬佢都傻，一支箭標去入閘。好彩司機冇死纏，唔係都好麻煩。其實美國搭的士懶例要畀15-20%貼士，近年有咗電子收費，畀錢時可以自選畀20/25/30%，但原來唔一定要畀呢個range！收費錶上有自訂一欄，服務好一般的話，畀15%已經算畀面佢！