跟《 太陽的後裔 》去旅行! 2大希臘談情秘境
太陽的後裔 百三億韓圜 ~ 重新定義！希臘浪漫
《太陽》製作費高達129.8億韓圜（約8,300萬港元），每集平均為8億韓圜（約512萬港元）。當中最揼本係成隊攝製隊於去年9月底遠赴希臘，更停留長達1個月拍外景。當地居民見到咁大陣仗都非常驚訝，連希臘電視台主播都慨歎「自己電視台劇集製作完全無得比！」
劇組率領大批軍服演員，仲有軍車等殺入希臘，附近居民一度以為係朝鮮（北韓）軍隊，當地新聞主播仲講笑話：「其實係南韓軍隊先真！」
烏魯克究竟喺邊？
「烏魯克」其實係虛構出來，劇中提過其位置於巴爾幹半島下方，富於南國風情。取景地點除了有希臘西部的「天堂之島」Zakynthos 之外， 仲有中部山城Arachova，兩地其實相距4個半小時車程，不過劇中就結合成為「烏魯克」。第3集沉船灣談情戲、第5集喬妹炒車同第9集談情掃地雷，都在Zakynthos 西面海岸拍攝，而第5集宋仲基重遇昔日戰友開槍一幕則在Arachova 山城取景。第6集地震，亦有用CG 做出山城崩塌的影像，製作真係好認真！
劇情講乜？
全劇16集的《太陽》，講述外科醫生暮煙（宋慧喬）因為拒絕性騷擾得罪高層、連累全組同事被調職到東歐戰區當無國界醫生，重遇之前在首爾搭上的軍人劉大尉（宋仲基）；集集瘋狂調情，戰亂、地震、瘟疫、販賣人口都係用作孕育幽默浪漫冧女對白的場景設定。
藍白屋仔？！聖托里尼無份！
Arachova與Zakynthos分別位於希臘的中部及西部，前者由雅典出發向北約2小時車程就到，至於要搭1小時飛機前往的聖托里尼，就不在場景之列！藍天小白屋都經典咗幾廿年、無乜新鮮感，識得玩就梗係跟《太陽》一路向西啦！
沉船灣實地踩場
《太陽》籌拍初期，劇組曾考慮過去新加坡同印尼取景，不過根據劇情設定，拍攝地點必須既隱秘又有異國風情（仲要有啲啲戰地feel），後來劇組在網上見到「沉船灣」的圖片，就決定鎖定目標，無論幾遠都要去拍攝，結果全劇大部分外景均於希臘進行！第3集尾段，宋仲基為了可以見多喬妹幾面，於是駕著快艇帶佢來到偏僻的沉船灣談心，其實呢個絕景一向都係度假秘境，《新假期》舊年暑假就去過實地採訪……
“因為它被美麗的東西迷住了⋯⋯”
破船意外沿於卅幾年前因走私煙草、逃避海軍而擱淺，私煙喎！唔係暮煙！現實都幾重口味……
理想 VS 現實
本刊記者於去年7月夏天（正正在《太陽》9月開拍之前）搶灘。劇中宋仲基好有型咁揸快艇帶喬妹去四野無人的海灘談心，現實中我哋都係搭快艇登陸，旺季的海灣人頭湧湧，過百遊客落船的情景，好似「登陸諾曼弟」咁墟冚！至於碧藍嘅海水就真係無花無假靚過電腦特技，比起記者去過3次的馬代更靚！沿岸仲有好多白色石春（即係宋仲基執畀喬妹的信物！）現場石頭周圍都有，不過明顯劇組花過一番心機將石頭砌靚擺上船身，拍出來效果更浪漫。除搶灘登陸沉船灣，一場來到千萬不要錯過崖上的靚景，劇中喬妹都有去到崖頂回望沉船灣仲FF 同仲基一齊拍拖，喬妹企呢個位係由觀景台向下坡走約300米，離地面高達200米的懸崖邊，雖然可以望到沉船灣全貌，但都真係幾腳軟㗎！
執石，確係流行
宋仲基襯住拍攝空檔走去執石仔寫字，點知 zoom 近一睇佢竟然寫咗「仲基光洙」仲括住光洙「亞洲王子」的別號，勁 hehe！
《新假期》都係推介包船！
想學宋仲基包船去海灘？船程只需20分鐘左右！另一個方法就係參加ZakynthosTown一天遊，搭2個小時慢船去到沉船灣，不過隻船又嘈又多人，建議都係花多少少錢包船啦！
- Navagio Beach 一天遊
行程：前往觀景台及搶灘
費用：每人€35-50/ HK$298-425
查詢：Fidelity Trave（l www.fidelitytravel.gr） - Porto Vromi 包船
（不包括往碼頭之交通）
費用：每小時€60-100/ 約HK$510-850
必紅！中部山城 浪漫啜爆位
若以方便程度計，歐洲旅客鍾情的「沉船灣」需要轉機又駁船，而且只靠一幕談情「食糊」， 確實係偏遠；真正配合劇情推進而又適合「冧女」同行，可以選擇近幾集反覆出現的Arachova 山城，由雅典出發只不過是日歸行程，但就有好多幕關鍵場面讓大家滿足追星願望！大概當地旅遊局都識意到勢必成為熱爆景點，收到攝製隊的申請之後，即刻開返個Facebook 專頁吸客仔，目前都有九百幾個like 㗎！
若你來到山城中心，記得要認住地標鐘樓就係雙宋咀嘴位，沿石級向下走，就可以見到槍戰背景出現的小教堂，穿過教堂直行就見到一座2層樓高的白色建築，就係兩人飲嘢的靚景 Café，上返大路就正正係槍戰門口間餐廳位，短短約10分鐘路程就已經可以將所有景點逐一集郵啦！
第4集二人去飲嘢間餐廳、第5集宋仲基與變咗壞人的CaptainArgus槍戰， 都係於Arachova 一帶拍攝。
一般例牌觀光團，都只將Arachova當作前往古蹟德爾菲（Delphi）的中途站「廁所位」，若無要求落車，甚至「過門而不入」！
Arachova原本只係冬季才旺場、供滑雪友補給的山城，中文旅遊資訊極少！
山城最高位，網上劇透流出，鐘樓下終極浪漫Kiss！
Local Tour推介！
暫時一般希臘中部的旅行團，都唔會單獨遊Arachova山城，可選中部1天遊的雅典近郊套票，行程安排較靈活，前往Delphi中途必經Arachova，可以停低影多幾張靚相。
價錢：約HK$760
網址：www.viator.com
延伸閱讀：
玩命跳懸崖! 希臘4大藍色沙灘歎世界 （上）
住得好澳門遊! 3大最新話題酒店推介
有到日本旅遊前要了解的實用資料嗎？
日本是香港人最愛的兩大旅遊地點，去旅行前必看5大旅遊保險保障新冠肺炎的比較，另外為你推介日本10大好用電話卡，亦可參考日本8大Wifi蛋推介。當然亦要事先了解日本地區天氣、電壓、電源插頭、入境簽證要求及大使館電話。
