為青春地攤燒烤｜深圳全自助串燒店！新鮮即切即串肉類＋免費養生花茶任飲

為青春地攤燒烤｜深圳全自助串燒店！新鮮即切即串肉類＋免費養生花茶任飲

「為青春地攤燒烤」每枱均配備全自動式嘅燒烤爐，客人淨係需要將串燒放上去，燒烤爐就會自動360°轉動食材，保證燒得均勻之餘仲十分輕鬆！

為青春地攤燒烤｜工業風裝修

餐廳裝修走工業風配合木紋橫樑及水泥磚，整體感覺非常有開放感又夠光猛。而且每一台都配備抽煙機，唔使擔心食完成身油煙味～餐枱提供4-12人枱，啱晒一大班朋友過嚟食飯吹水！

食材款式豐富

餐廳外面為食物自助吧，客人可以慢慢挑選自己鍾意嘅串燒。食材款式亦都相當豐富，除咗有齊各種調味嘅豬、牛、雞、羊、海鮮、丸類、蔬菜之外，亦都有一啲特色小食例如：煉奶烤年糕、海鮮、東北冷麵等等！

每一款都明確列出價格同埋烹調方法，最便宜的蔬菜類約¥1-2就有一串，而且客人可以透過中間嘅開放式廚房睇到員工處理串燒嘅過程，員工們帶齊手套口罩同頭罩，衛生有保證！店舖宗旨亦保證肉類唔會留隔夜並且現切現穿，乾淨企理又新鮮，CP值相當高！

為青春地攤燒烤｜免費養生花茶任飲

餐廳除咗有各類汽水、椰汁、楊梅汁同檸檬茶之外，亦都非常貼心提供咗免費嘅養生之選，菊花、紅棗乾、冰糖同檸檬片等，客人可以自行調配鍾意嘅味道，健康之餘更可以消滯解膩！