經典永流傳 地勤仔大派花生： 明星搭飛機 爆笑趣聞【Check- in篇】
#01 【中大基督徒】單眼扮熟 博免收超重費
行李過磅要求地勤人員網開一面相信不少人都試過，少少哋2、3磅都可能有機會過骨，但兩大車行李都夠膽？上世紀憑住唱上、下集情歌紅過一陣的名人S，就選擇先以呃水吹扮熟，繼而以45度微笑兼單眼的俏皮舉止，試圖博取地勤免收行李超重費，可惜最終失敗而回，換來是這件被業界花生友廣泛流傳至今的風光偉跡……只可以講，架是自己丟的！
關鍵字：#TVB #中大 #基督徒 #大陸 #知不知每晚想你十次百次
#02【飲綠茶墮馬】 癡女見偶像 飛上海變上京
地勤都是普通人，面對名人，並非個個都把持得住，何況是細細個已經鍾意的天王級巨星，有地勤就因為只顧睇明星，而犯下大錯。話說名人A原定要到上海公幹，該地勤卻錯誤輸入為北京的航班，天王本人懵然不知，直至在登機閘口撞見「獎門人」，傾談下才發現自己差一點就坐錯機！由於事件實在太嚴重，該地勤都難逃要收warning letter的命運，最慘是喊到豬頭都不獲同情。
關鍵字：#四大天王 #童年回憶 #綠茶 #墮馬 #生女
#03【露股影帝】拒做港豬 有氣有力真男人
其實並非所有名人都難服侍的，話說有次名人L同太太一齊check-in，地勤準備幫對方件行李攞上磅，名人L即時自動波出手，仲好友善咁話：「呢啲梗係男人做啦！」對比絕大部分蹺埋雙手闊佬懶理的港豬來講，絕對是最佳乘客的典範，作為地勤自然印象分大加，最有趣是檢查證件時，名人L張相竟然是呂奇造型，當該地勤一抬頭，名人L竟然笑眯眯望住對方俾反應，盡顯風趣幽默的性格。
關鍵字：#影帝 #硬漢 #孖女 #露股 #超級好男人
#04【野生捕獲】真正特首 合照永無Say No
稱得上「民間特首」的名人C並非浪得虛名，貴為超級巨星，每次出入機場都會引起一陣哄動（要強調並非當事人太高調，純粹巨星磁場太強，無論行山、行街市都成為市民野生捕獲對象），地勤為表現專業的一面，惟有暗暗隱藏1顆少女粉絲心，但在場其他搭客就相當興奮，該地勤更目睹名人C好nice咁同歪國人影迷有講有笑先離開，真正國際巨星的風範！
關鍵字：#荷里活 #南丫島 #民間特首 #親民 #行山 #九龍城
