《 在那遙遠的地方‧ 古巴 》洪永城檢視10年巨變!

2016 古巴事變

去年冒著被送去勞改的危險，深入北韓拍攝，日日被人盯人監視。Tony 今年原班人馬一行五人出發古巴，迎戰隔籬新台大量充滿話題的旅遊節目：「出發前以為都係共產國家、資源又唔多，古巴人生活實好壓抑啦，拍攝又會好煩啦。但現實又唔係，在古巴唔使驚講錯嘢，唔使申請去到即興問吓店長，得就即刻開機拍，在街上舉起鏡頭都無人理。最正係古巴人好敢言，問咩答咩。」無驚無險拍成五集古巴特輯。
W：《新假期》 T：洪永城
W ： 點解會去古巴？
T ： 美國對古巴政策改變，相信會為當地帶來急速發展和改變。所以呢， 依家唔去，之後就未必見到古巴街頭咁獨特、咁懷舊的風景啦！為今次拍攝，我們前後飛兩轉，夾埋去咗廿日左右，到訪夏灣拿、聖克拉拉、雲尼斯山谷三地。要睇通街行的古董車和哲古華拉嘜頭之外， 仲想了解吓當地人在呢個歷史時刻，面對開放的想法。

W ： 面對開放，古巴人的心態係點？
T ： 今次拍攝訪問很多當地人，有啲老人家依然好憎美國，但大部分年輕人都好恨改變，想賺多啲錢改善生活質素，特別係解除禁運，可以入口外國貨；當地人亦歡迎放寬旅遊， 原來做醫生、老師，月薪大概只有三十蚊美金，不過做的士司機可以一個月搵二千美金。
W ： 覺得古巴會唔會在短時間內全面變天？
T ： 香港因為迎合自由行口味，藥房、金舖開到通街都係；若果當地無推出平衡的政策，古巴可能唔使三五七年，就會好似今日香港咁，為了迎接歐美遊客，老麥、商場開到成行成市，變成一個好平庸、無特色的加勒比海度假城市。是好是壞不由我去批評，所以都係嗰句，變天前快啲去一次！

古巴交易現場
2011古巴通過合法自由出售個人物業法例，只不過當地依舊唔興賣廣告，亦都暫時未有地產公司壟斷，要出售自己屋企，就要去到指定的地產交易市場公園做人形紙板。

上網有問題
正值奧巴馬訪問古巴前夕，夏灣拿周圍都係「執靚啲」修路工程，亦都鋪設梗固網上網線路，預計2020年就有一半人口有網上。其實古巴早於去年起，已經開始鋪設Wi-Fi spot，現時全國有不多於70個，未來一年會多一倍。

向世界收客
自冷戰時期，美國一直禁止國民到古巴旅遊。咁多年無得去，所以在09年放寬旅遊限制後，美國遊客數量即時增長超過17萬，今年開始已有加勒比海航線郵輪加入夏灣拿一站。

塔利班金枝獄孽
美國曾在上世紀向古巴永久租用關塔那摩灣，建設海軍基地，成為雙方交惡的根源之一。今次TVB 成功向當局申請，深入位於基地之內，專門囚禁恐怖分子的關塔那摩灣監獄。

走過煙草大地

古巴出產的雪茄質量冠絕全球，加上因為當地絕大部分的餐廳和Café 都無禁煙規例， 隨處可見抽著雪茄的人，Tony 說：「每日在古巴街頭最少見到十幾位食住雪茄的老伯，好鬼型。外國客亦例必掃雪茄做手信，當地一支雪茄大約港幣70元，在香港買要Double！」不過古巴的手製雪茄買少見少，想搵最靚雪茄，Tony由夏灣拿出發，乘3小時車去到全世界最優質的煙草產地雲尼斯山谷（Viñales）。「山谷方圓幾里都係種煙草，一大片煙草田睇唔到盡頭，採集之後在於鄰近的小工場曬乾。雖然並非製煙工場，但亦會讓參觀遊客體驗手製雪茄。咪以為好似捲煙，捲一捲就搞掂！原來過程都幾複雜、幾難，要反覆捲五層，煙草種類、粗幼都有學問，仲要好大力壓。不過見我論論盡盡，要師傅出手幫忙，我想我比較適合買現貨。」

後記 恐懼本身
要代表古巴，數古董車和雪茄之餘，仲有佢哋嘅革命之父哲古華拉，在夏灣拿街頭通街都見到佢嘅嘜頭。仲以為今次Tony 會一貫貪玩作風扮下呢位革命英雄，結果只係著咗套當地傳統民族服。今次訪問前提議Tony以哲古華拉造型影相，不過Tony 耍手擰頭，回覆話想用一頂「無星」的帽代替喎。唔知係咪擔心呢個造型容易令人聯想起長毛，擔心曲線幫隔籬新台旅遊節目做宣傳呢？