周奕瑋食雞刺身 觀眾打冷震 ｜ 細數旅遊飲食節目 5大搞鬼食物

撰文：關西旅行愛好者 | 圖片：《周遊關西》、《關西攻略》、《今個夏天食平D》、《大灣區 活好D》節目截圖

周奕瑋食雞刺身 觀眾打冷震

日本人一向有生食文化就係人都知，不論海鮮定係牛肉，日本人都喜愛整成刺身。有日本通之稱嘅周奕瑋喺《周遊關西》旅遊節目中，帶觀眾去到大阪市一間專食雞刺身嘅舖頭，更話要成為會員先有得幫襯。

店長只需用20分鐘，就可以將一隻雞切成28個部位。節目中就見到周奕瑋試食生雞腎同生雞冠，仲大讚雞腎味道甜，雞冠夠爽口。周奕瑋果然膽識過人。

周奕瑋食雞刺身的網民反應

不過就睇到觀眾心都離埋，更話雞刺身好恐佈，睇住Jarvis食都想嘔。

肥媽教整西瓜Pizza

肥媽同陸浩明主持過好多《食平D》系列，喺2016年《今個夏天食平D》中，肥媽就教大家整西瓜Pizza。其實西瓜Pizza喺外國都幾流行，不過外國做法就係將西瓜切片後，加上水果粒同乳酪；而肥媽就教大家將西瓜切片，擺喺有坑紋嘅煎Pan上煎成金黃色，加上青瓜、芝士、橄欖等配料，食前仲要加番啲黑醋，成為終極「伏嘢」。

肥媽推介大灣區食鯇魚魚生

講起肥媽，最經典莫過於上年主持無綫《大灣區 活好D》節目，其中一集就由另外兩位主持黃美棋同林伊麗，試食佛山一間食肆嘅鯇魚宴，當中更特別推介招牌魚生。鯇魚出名多菌，咁都可以做刺身？

去到另一集，肥媽介紹用薄切嘅鯇魚魚生加上唔同配菜撈埋嚟食，幾位主持未食都已經話好正。

‘

不過本港食物安全中心就喺Facebook發文，呼籲市民切勿進食如鯇魚同大頭魚等淡水魚生，因為有病菌之餘更可能有寄生蟲。其中一種中華肝吸蟲，嚴重可造成膽管梗阻、肝硬化同引致膽管癌。食物安全中心同時亦表明酒、醋、日式芥辣、黃芥辣等香料都殺唔死當中病菌。

杜如風筷子插拉麵「參拜」

呢款拉麵就唔算搞鬼，但係杜如風嘅行為就令人𢱑爆頭。16年《關西攻略》中，杜如風帶大家去到日本愛知縣一間拉麵店食豚骨拉麵。不過拉麵上嘅湯非常濃稠，杜如風就話：「我不入地獄，誰入地獄」，再用三枝筷子直插入麵中，拍掌兩下再合掌參拜話：「我希望我撈到塊豬肉出嚟！」

呢個舉動就令唔少網民嬲爆，話佢故意將筷子扮成三支香插喺碗，十足十拜神，失禮自己之餘又唔識尊重人。

杜如風被批推介「伏」蟹宴

同樣都係《關西攻略》，杜如風第一集就帶大家去大阪市食蟹宴，指3,000円(約215港元)就可以食八道菜，影出嚟就非常吸引，所以就唔少觀眾都去試吓。

但係再睇返觀眾食評，有唔少人都表示一個字：「伏」，有人喺討論區更話係全個大阪行程最差嘅一站。

網民：「Walk in去到話full booking要5日後先有位，入到去未坐低就已經見到個所謂蟹煲擺咗喺枱面，我唔知係咪成間餐廳都只係得兩個選擇啦（3,000/4,000円嘅餐）。我最後揀左3,000円嘅餐，但係兩個人加埋嘅份量係連一隻完整嘅蟹都見唔到，仲要焗你每人要額外叫一杯飲品，最後食完我係連5成飽嘅感覺都無…….」

不過嘢食呢家嘢都係各有各喜好，總會有人覺得好，有人覺得差。而且有啲食物，已成為當地人飲食文化，最重要係尊重人同埋注意衞生。