台中必食招財貓冰! 文青推介4大懷舊餐廳 |台灣|

Mar 14 2016

近年台中興起舊屋翻新，唔少商家都因為唔捨得歷史悠久嘅舊屋被拆而索性原裝改建，外面就保留原始古味外觀，裡面就重新配合現代設計發展商業用途，一舉兩得，其實都值得香港多多借鑑！今次就同大家一齊開始呢個懷舊時光之旅，同大家一邊享受食物，一邊細味老台灣。

懷舊餐廳1：CAFÉ 1911，昭和沙龍

台中市役所於1911年成立，係台中舊城區極具代表性嘅建築物！台中市役所可謂「身經百戰」，因為921地震而令震毀部分建築物，經過前幾年後嘅修複及活化工程後，終於結合餐飲服務同文創概念嘅新據點！當中嘅「文創園區」除咗有免費嘅藝術之覽之外，仲有兩間以日式昭和風格嘅主題餐廳，完全配合到台中市役所於日治時期嘅歐式華麗設計。

CAFÉ 1911位於一樓，本來以為係食西餐，但望多兩望，就可以意會到餐廳名係同台中市役所嘅成立年份－1911年有關。由於當年嘅台灣正經歷日治時期，所以入面食日本嘢真係一啲都唔出奇！餐廳提供日式昭和風丼飯、套餐為主，另有提供各式台式飲品，將日式、台式餐點mix ＆ match，符合市役所嘅歷史背景之餘，亦令人有奐然一新嘅感覺！
餐廳風格非常優雅大方，落地玻璃映入日光，令木造餐桌更有質感，環境舒服。

不過，有喺試業期間去過嘅網民就話客滿時，環境就有啲嘈吵焗促。其實呢度亦有提供戶外用餐區，喺戶外用餐又有另一種風味～

留意返餐牌，定食、丼飯套餐，甚至小食都一應俱全，飲品種類更可有廿多款選擇，真係唔怕你嘢啱食，只怕你唔知揀咩食好！而各套餐約港幣＄60－70到，仲配合埋咁優雅古典嘅餐環境，值！

12733514_423011424572959_4715379949498014289_n — 圖片來源：台中市役所Facebook專頁

市役所特製定食 TWD$250-280 (約港幣＄60－70）

唔好以為定食只有一個主菜加一碗飯，其實跟餐仲包埋2道漬物、海鮮雞肉茶碗蒸、味噌湯同茶，一啲都唔馬虎！網民就話餐點表現中規中矩，試食嘅炸豬扒定食較硬身，反而雞肉親子飯就好入味，而另外點嘅小食份量就較少。

日式唐揚雞 TWD$90（約港幣＄22）

唔少食客都有點呢款日式炸雞小食，味道不俗。

12510289_411929445681157_7190202033674730600_n — 圖片來源：台中市役所Facebook專頁

位於二樓嘅昭和沙龍，只賣茶品同冰點。「昭和」係指昭和時期，但「沙龍」又係何解呢？原來係以前法國人用嚟款待貴賓嘅地方，而市役所亦希望帶呢個待客如賓嘅態度畀客人，故取其名！呢度同CAFÉ 1911嘅西式設計唔同，帶和洋風。當中，唔少遊人都會嚟呢度飲杯珍珠奶茶，點個可愛程度可以話係難以令人抗拒嘅招財貓冰，影張勁chill嘅嘆茶相，即時打卡！

裝飾嘅燈籠亦參照日本宮燈而製。

10399035_422919401248828_5331534269487778576_n — 圖片來源：台中市役所Facebook專頁

特製芒果招財貓冰 TWD$150 （約港幣＄35）

呢款被食客瘋點嘅招財貓冰原來都大有來頭！設計源於明治時期流傳嘅文化，左手招客，右手攬住小判金幣（即係千萬兩），象徵招運又招財！

12802958_427037144170387_3376366376963258757_n — 招財貓冰造型可愛，五種配料中任選三種，綠茶蛋糕、紅豆同珍珠更係必試之物！圖片來源：官方圖片

京都抹茶雪糕 TWD$60 （約港幣＄14）

除咗可愛招財貓冰，抹茶雪糕都非常受歡迎！網民話抹茶味香，另有朱古力味。

市役所珍珠奶茶 TWD$65（約港幣＄15）

招牌珍珠奶茶簡直係人人必點之物！唔少網民話珍珠口感qq，值得一讚。

台中市役所
地址：台中市西區民權路97號（顯示地圖）
營業時間：星期一至日10am-9pm（每月第三週的星期一休息）
電話：04-35077357
Cafe 1911
營業時間：：10am -9pm
昭和沙龍
營業時間：：10am -9pm

懷舊餐廳2：宮原眼科

提到宮原眼科，各位旅人都知道佢係台中一間勁多嘢買嘅手信店！其實位於台中火車站附近兼前身係眼科醫院嘅宮原眼科歷史相當悠久，有足足88年歷史！買就買得多啦，但呢間老房子究竟入面有乜好食，而令佢成為各位旅人食家去台中都要一遊呢？之唔係呢度有間人龍店囉……

417016_340651539318655_510800469_n — （官方圖片）

呢間老房子外部保留住古舊嘅紅磚拱形迥廊，入面佈置得有如圖書館，必影！

宮原眼科

宮原眼科雪糕店人龍之店！呢間雪糕店每日提供數十種口味嘅雪糕，一共有分朱古力、水果同茶，三大種類。提供嘅味道亦相當講究，淨係朱古力雪糕都有成18種，由濃度43％到100％都有！除咗雪糕之外，仲可以揀配料，各式水果、果仁、餅乾，甚至連芝士蛋糕、鳳梨酥都有，客人仲可以免費揀4種呀！咁多選擇，排隊果陣揀定就差唔多啦！