二次創作萬歲！惡搞台灣政客Card Game |台灣|

新假期編輯部

Jan 19 2016

廣告

早前就係寶島台灣選總統嘅大日子！（無錯就喺香港開間書店都畀公安塔返大陸嘅今日，人家早已一人一票無篩選咁真普選，第6次喇！）台灣選舉出名全民參與，最近記者喺當地採訪，發現時下台青，竟流行一款將政治人物當係公仔紙咁擺上枱玩嘅遊戲！

柯P 都玩！戲仿政府高層咁抵死，就連「官到無求膽自大＠台灣版」嘅台北市長柯文哲都畀面試玩。

遊戲極盡抽水，如今年第四度參選的宋楚瑜就有「屢戰屢敗」絕技；未有實際政績的蔡英文就叫「空心菜」，好抵死。

呢套叫做「美麗島風雲」的政治 card game ，開宗明義大搞二次創作，惡搞政黨人士；遊戲入面嘅馬英九、陳水扁以至蔡英文，個個面目可憎，創作單位話係還原政治現實喎。玩法方面亦好啜核，玩家隨機扮演一眾政棍，然後利用「黑材料」、「造勢晚會」同「政治獻金」等技能卡，玩弄權術務求登上大位！

Game入面大家可一嘗金權勾結嘅快感；密會、獻金、轉移視線、看不見的手，嘩好似睇緊689 施政大事回顧咁喎！

眼見成班學生玩得鬼咁得戚，記者心諗好彩佢哋唔係同我哋阿689 特首玩咋，如果唔係輸死都未天光啦傻仔！

真。政治記者＠台灣蘋果日報郭郭：這遊戲滿有台灣風格的，大家邊玩遊戲邊聊政治，通過挖苦政治人物，很多議題就變得很親近，政治不再那麼遙遠了；也方便大家慢慢的去關心社會時事喔！

關鍵詞

689 card game 二創台灣