母親節要快樂啊~帶住阿媽去旅行 13個激心中伏位 @杜遊珍
01. 酒店住宿 ──── 名牌要緊、小眾累事
阿媽真係好唔識欣賞嗰啲好rustic 呀、industrial 呀、artistic 嘅設計,仲會嫌唔夠光猛、啲畫邪邪哋,所以請你盡量揀佢懂得嗌酒店名的地方,例如四季、半島,平啲可以揀Four Points by Sheraton( 因為有「喜來登」三個字), 以曼谷為例, 半島經常做4K 樓下的四天套票,好抵,好啱帶阿媽去!
![就算唔游水都唔緊要,有泳池即刻升格幾倍。](https://imgs.weekendhk.com/wp-content/uploads/2017/11/nhv4dxh3MJN7gxp/2345_9861637475a1e84047a7b8.jpg)
02. 膳食安排 ──── 地道行先、掃街最潮
再以曼谷為例,盡量帶阿媽去街邊檔,因為佢哋真係好鍾意食!濕濕哋嘅河粉、香噴噴嘅串燒,仲有芒果糯米飯,硬係覺得街邊好食啲,因為有風味之餘,亦係唯一可以通知師奶fans「我做過當地人」。
![掃過吓街,返去先有得曬命自己去過。](https://imgs.weekendhk.com/wp-content/uploads/2017/11/nhv4dxh3MJN7gxp/6937_1154248255a1e8426b0460.jpg)
03. 食量估算 ──── 多菜少肉、少食多餐
雖然阿媽食得唔多,但通常好為食,好似金魚食極唔飽,同時又不斷話:「我依家食好少㗎、蒸條魚烚條菜就係一餐。」 你由得佢講啦,你話去食喇沙佢就話好㗎喇!另外,阿媽係好喜歡去果園的,即摘即食嗰種!
![絕對要有心理準備每晚都要食水果⋯⋯](https://imgs.weekendhk.com/wp-content/uploads/2017/11/nhv4dxh3MJN7gxp/d312_16409018635a1e843d4d9f0.jpg)
04. 景點策劃 ──── 超市才是王道!
之前提到寺廟只是到此一遊,真正戲肉係超級市場!有朋友兩年前去沖繩,幾乎去勻全島AEON( 當時仲叫「吉之島」),每晚買生果作宵夜,仲要抬返幾箱返香港,成班阿媽親戚已經好開心,今年過年仲講緊!另外曼谷Big C就更加係父母逛到唔願走的shopping大觀園⋯⋯
![阿媽 旅行](https://imgs.gotrip.hk/wp-content/uploads/2016/05/nhv4dxh3MJN7gxp/bigc_bkk_parents.jpg)
05. 腳骨力評測 ──── 攰都唔出聲
自由行當然冇旅遊車點對點運送,路就自然行得多,但老人家幾時攰真係好難估,最常見就係勁攰都唔出聲,返到酒店對腳痛到第日行程半取消咁滯!心得係: 你自己覺得開始攰時,相信就係阿媽需要坐低休息嘅時間時,將體力同步,先可以齊齊去得更遠嘛!
![阿媽 旅行](https://imgs.gotrip.hk/wp-content/uploads/2016/05/nhv4dxh3MJN7gxp/momtravelProblem.png)
06. 讀心神探 ──── 狂講悔氣說話
阿媽成日去親旅行都狂講悔氣說話,又話食和牛貴、又覺得啲景點西貢都睇到。不過其實佢哋都只係呻吓,實質上睇完、食完返到去就會同身邊師奶嚟個「軍備競賽」,曬命自己去咗邊,所以佢話唔好食、景點無特別都只係講吓,聽完唔使太上心!
![阿媽經常口裡說不,但返到香港一定會同姨媽姑爹講睇過靚景。](https://imgs.weekendhk.com/wp-content/uploads/2017/11/nhv4dxh3MJN7gxp/888_10890416805a1e845991742.jpg)
07. 耐性暴跌 ──── 唔願排隊
去得好味嘅餐廳,排返15分鐘都係基本,有時甚至要等1個鐘。一見到條人龍佢哋猶如撞鬼,擰晒頭嗌要走,但呢個情況可以理解,特別去旅行已經要行咁多路,仲要企咁耐去食一餐飯。不妨去搵餐廳時揀比較早嘅用膳時間,錯開人流高峰時間,食都食得開心啲。
![見到呢條長龍,應該即刻擰晒頭。](https://imgs.weekendhk.com/wp-content/uploads/2017/11/nhv4dxh3MJN7gxp/tosaka_31_10577618915a1e849182496.jpg)
08. 最好又要最抵────嫌三嫌四
師奶向來都係慳家專員,又要抵食但又要好食,成日都嫌三嫌四,哪來咁多 CP 值超高嘅餐廳、景點?出發之前同爸媽預告定某啲餐廳、景點會比較貴,畀定相佢哋睇,用多少少錢都值得!戴定頭盔到時就唔怕有太多怨言。
![食貴嘢前同爸媽講定一聲,唔係就會不停嫌貴。](https://imgs.weekendhk.com/wp-content/uploads/2017/11/nhv4dxh3MJN7gxp/55_12452942185a1e84a77c96c.jpg)
09. 使費預算 ──── 充大頭鬼
有時搵到錢想帶爸媽去旅行,佢哋總會話嗌埋姨媽姑姐去,去都算,自己應該淨係出父母份錢;點知佢哋會充大頭鬼,要請埋同行親友食呢樣個樣,用多咗仲要仔女填返嚿錢。唔想阿爸阿媽充大頭鬼,去之前就講定一齊夾一個「阿公」出嚟,要食飯就喺阿公到拎出嚟,實行家族AA制!
![最好當然係夾定一筆錢做「阿公」,唔使口同鼻拗。](https://imgs.weekendhk.com/wp-content/uploads/2017/11/nhv4dxh3MJN7gxp/yen_4839946165a1e84c3d3828.jpg)
10. 勢不低頭 ──── 以為自己乜都識
「唔使問人啦,行呢邊咪啱囉!」明明未去過嘅地方都講到好似當地人咁,呢個情況最常喺老竇身上出現。其實Google Map咁發達真係睇吓都無問題,如果預到呢個情況,就挺身而出講句:「唔使嘈!我去問!」,因為佢哋都只係覺得唔識要問人好失禮啫。
![睇地圖其實唔難,如果爸媽唔想睇,不如自己出手先!](https://imgs.weekendhk.com/wp-content/uploads/2017/11/nhv4dxh3MJN7gxp/5603_12969648015a1e84ef508b7.jpg)
11. 守舊思想 ──── 唔肯試新嘢
阿珍就有同事講過,佢爸爸去到美國都淨係想食中菜,點都唔肯試吓西餐。鍾意食海鮮又瘋狂搵海鮮餐廳,完全無諗當地出唔出名。老一輩係比較抗拒新事物,但既然帶得佢哋去旅行,證明已經係新嘗試,不妨遊說吓父母!
![中菜一定是首選,西餐?不了不了。](https://imgs.weekendhk.com/wp-content/uploads/2017/11/nhv4dxh3MJN7gxp/43_197k_ww_5990816545a24d5af09c70.jpg)
12. 乜都要管 ──── 阻止買嘢
自己去旅行或者同朋友去,都會有瘋狂 shopping 嘅部份,但同父母去,佢哋就會怕大花筒,不停咁阻止自己買嘢!去到外國都唔買真係對唔住自己㗎嘛!
![去旅行唔畀買嘢真係激心到頂點。](https://imgs.weekendhk.com/wp-content/uploads/2017/11/nhv4dxh3MJN7gxp/5305_1-ww_6699943135a24d5dae5016.jpg)
13. 慳過頭 ──── 貪小便宜
溫泉旅館浴衣又要拎,以前飛機上面鐵叉都要拎,貪小便宜嘅程度猶如參加咗《慳錢家族》,見到呢啲事真係覺得好瘀,但出聲佢哋又話我哋煩。陣間貪貪吓連香港人個名都整衰埋!
![飛機餐上的鐵叉絕對是高危物品。](https://imgs.weekendhk.com/wp-content/uploads/2017/11/nhv4dxh3MJN7gxp/s2-ww_13977407775a24d5fc8a001.jpg)
不過,既然帶得爸爸媽媽去旅行,都一定預咗同自己去旅行有分別。不過,佢哋當年眠乾睡濕湊大自己都無怨過,一年先辛苦幾日帶爸媽去旅行,又有咩咁大不了?
下一頁:【帶住阿媽去旅行】每年一度 二人成團|阿媽泰姬陵前表演瑜伽
![母親節要快樂啊~帶住阿媽去旅行 13個激心中伏位 @杜遊珍](https://imgs.weekendhk.com/wp-content/uploads/2017/11/nhv4dxh3MJN7gxp/ww_og_yuen_10718157915a24eb5e27b69.png)