想出去玩得開心又放心 計劃離港外遊前 5個必讀旅遊業賠償基金注意事項 !

係人都知香港人生活壓力大，唔少朋友，尤其年輕一族，都鍾意出外旅行散吓心，放假抖吓氣。不過外遊要玩得開心又放心，大家就一定要確保自己嘅旅程受到全面嘅保障。就好似香港其實有個旅遊業賠償基金（簡稱「賠償基金」）係可以保障外遊旅客㗎。今次一於同大家講吓外遊前 5 個必讀賠償基金注意事項。計劃離港外遊嘅你，記得留意喇。

1. 了解賠償基金所提供嘅保障

簡單嚟講，外遊旅客如果損失咗外遊費，賠償基金可以為受影響旅客提供所損失外遊費 90% 嘅特惠賠償，呢個情況一般發生喺持牌旅行社倒閉嘅情況下。如果萬一唔好彩，外遊旅客喺持牌旅行社提供或舉辦嘅外遊活動中意外傷亡，係可以得到總數高達 HK$300,000 嘅特惠賠償以報銷當地醫療、殮葬/遺體（包括骨灰）運返香港以及親屬因旅客傷亡而往訪當地所招致嘅實際開支。

相信大家讀到呢度，都會有相近嘅疑問：咩叫做外遊旅客？外遊費一般包括咩項目？ 點先可以確保自己能夠受到賠償基金嘅保障？咁大家就要留意埋下面四個重要嘅注意事項喇！

2. 知道點為之係「外遊旅客」

話明賠償基金係保障「外遊旅客」，咁點為之係「外遊旅客」呢？根據《 旅行代理商條例 》（第 218 章），「外遊旅客」係指已經向持牌旅行社付款購買下列全部或任何兩項服務的人，包括：

1）由香港出發去內地或海外嘅交通；

2）喺香港境外任何地方嘅住宿；

3）喺香港境外任何地方嘅活動（由持牌旅行社安排）。

所以大家要買咗上述其中兩項或以上嘅服務先喺法例上屬於「外遊旅客」，可以得到賠償基金嘅保障。

而根據呢個定義，購買單項機票、船票、巴士票或酒店住宿嘅交易係唔屬於賠償基金嘅賠償範圍。另外，購買咗一啲冇明確指定可以兌換上述任何兩種或以上旅遊服務嘅旅遊現金劵或優惠券都唔屬於基金嘅賠償範圍，大家要了解清楚喇。

3. 知道「外遊費」一般包括咩收費項目

一般而言，外遊費所包括嘅收費項目總係關乎（a）離港交通；（b）香港境外住宿；（c）香港境外活動（並且同（a）、（b）無關係）之中嘅任何兩項。大家可以參考以下一些常見外遊收費項目嘅例子：

離港交通：常見例子有機票/郵輪船票、座位升級附加費、飛機乘客離境稅、簽證申請費、客運燃料附加費、旅遊保險、機場保安稅和機場建設費等。

香港境外住宿：常見例子有住宿/房間費、單人房附加費、房間升級附加費、額外加床費用、額外早餐費用和郵輪上相類項目的費用等。

香港境外活動：常見例子有主題公園和景點入場費，同埋城市遊覽的費用等。

4. 記住揀持牌嘅旅行社

購買外遊服務嗰陣，無論你係上網買，定係去實體店買，記得一定要向持牌嘅旅行社買先可以得到賠償基金嘅保障。旅行社嘅牌照號碼係有六位數字，牌照號碼字頭會係“35”或“24”。

如果大家唔清楚你哋想幫襯嘅旅行社有冇持有有效牌照，可以瀏覽政府旅行代理商註冊處網頁查詢。（網址：https://www.tar.gov.hk ）

5. 確保取得印花收據嘅正本

如果大家買咗多過一項外遊服務（即係第（二）點所講嘅三項服務中嘅兩項或以上）， 就記得攞到付款收據正本後，一定要睇清楚收據上有冇蓋上印花（印花式樣見下列兩圖）。 印花都有兩樣嘢要留意。

首先，大家要留意番印花上面有冇清晰顯示徵收嘅金額同日期。記住呢，旅行社係要幫大家繳交相等於已付外遊費全數0.15% 嘅印花徵費。例如，如果你畀咗旅行社HK$8,000購買香港至曼谷機票連當地酒店住宿套票，你張付款收據正本上嘅印花就應該顯示旅行社已經幫你繳交左HK$12 嘅印花徵費。

仲有呢，大家要留意收據同印花上所顯示嘅旅行社名稱同牌照號碼，係咪同大家幫襯嘅旅行社一樣。

因為持有蓋上印花收據正本嘅外遊旅客，先會受到旅遊業賠償基金嘅保障。如果發現有唔妥，記得提你哋幫襯嘅旅行社糾正番呀。如果想查詢或投訴有關印花徵費嘅事宜， 可以致電香港旅遊業議會（電話：2969 8188）。

由傳統印花機發出嘅徵費印花嘅式樣：

由電子印花徵費系統發出嘅徵費印花嘅式樣：

了解完旅遊業賠償基金5個必讀注意事項，出發前亦要記得買番份適合自己嘅旅遊保險，雙重保障先係最醒！

想知更多關於旅遊業賠償基金嘅詳情，可以瀏覽 https://www.ticf.org.hk