巴黎機場中伏個案：機場巴士壞車錯過班機｜職員冷面對待 苦主損失過萬蚊
圖：新傳媒資料庫、Zenobeebee à Paris、相關機構
巴黎戴高樂機場 難行過迷宮！
法國巴黎明戴高樂機場（Aéroport Paris-Charles-de-Gaulle）喺好多旅客心目中，都有極壞印象，「迷宮般的通道」更加係最令人頭痛不已的問題！這個被GoEuro旅遊網評為「歐洲最差10大機場」的第6位，更是CNN 11年選出的「全球最令人討厭10大國際機場」的第1位！
有唔少網友都分享自己的慘痛經歷，事前對巴黎戴高樂機場冇做足功課的話，就好易中招！
錯過班機 損失過萬蚊
事主一行人於12月31日，乘搭中午的東方航空班機回港，本身已提早約3小時到達機場，但最後就因為巴黎戴高樂機場巴士的故障、安排不當而錯失班機，最後現場買機票而花費了過萬蚊！其間經歷了法國職員的冷漠、法國機場的麻煩、極差安排等等，勁多中伏位！
中伏位1：T1去T2要個幾鐘！
由於第一次喺戴高樂機場搭飛機返香港，同時又耳聞法國機場職員動作特別慢，事主強調已特別早約3小時去到機場，以免miss 班機。搭的士到達機場第一航廈之後，發現原來櫃枱設於第二航廈，心諗都只係一段小距離，肯定夠時間啦！
戴高樂機場有免費的巴士及機場接駁車，可以穿梭不同航廈，但要由T1 去 T2，並唔係一個站就到，職員當時解釋地面巴士唔會直接去到T2，要先搭穿梭巴士去到T3，再轉鐵路電車CDGVAL先可以去T2。
事主根據指示去乘搭機場的免費電車CDGVAL，結果等足幾乎半個鐘都未開，過咗好耐有乘客發現，車外的顯示牌上寫了因為故障而停駛的消息，於是大家馬上衝出去。但期間車廂完全冇廣播，亦冇職員提大家，成班法國人同其他旅客，完全喺度呆等！
離開CDGVAL上返地面，其間搵唔到任何指示可以去邊度搭咩車去到T2，只能跟著其他旅客行，穿梭巴士應該係臨時調過嚟載客，因此一等就係半個鐘，事主仲話身邊好多乘客已經Miss咗班機，佢哋一行人都如坐針氈，勁緊張！
等咗半個鐘終於有車，但並唔係由T3直接去T1，而係要由T3去Parking，返T1，再去Parking，最後先轉到去T2，雖然路面一直好暢通，但法國司機依然係優雅而又緩慢地行駛，開足半個鐘！結果只係由T1過返去T2，事主已經用足1個半鐘時間！
中伏位2：機場的士劏客！
經歷完CDGVAL的壞車之後，事主在T3外的馬路見到有的士，心動打算搭的士會快啲，結果的士司機開天殺價，短短的幾分鐘距離開 EUR35，幾乎是HK$350！事主唔想被劏到一頸血，亦都唔想益個司機，所以揀咗等漫長的免費巴士，但無諗過結果拖足佢哋咁耐。
中伏位3：第2航廈指示差 七分為2A-2G！
去到第2航廈仲有漫長的路要行，因為T2 裡共分7個區A-G，由2A-2G每個相距起碼10分鐘，而且機場內的指示非常不清晰，如果行錯方向，行番轉頭都要成10-20分鐘，事主搵咗好耐路先成功去到2E的check in櫃位！
中伏位4：機場與航空公司零協調
去到櫃枱，事主已經錯過咗check-in的90分鐘時限，錯過了回港的班機，佢哋因為機場巴士壞車及安排失當而導致誤點，機場卻完全沒有跟航空公司協調，或作其他安排。但機場對此故障完全不加以理會，亦沒有任何解釋，更沒有與航空公司作任何協調！
法國機場對自己的故障完全不加理會，更沒有與航空公司協調！
中伏位5：法國職員懶得協助
事主立即向航空公司的法籍職員尋求協助，並解釋是機場的接駁巴士故障所致，但職員只是以「No. You are too late. It’s not our fault.」為由，拒絕協助，當追問能否補錢買下一班機的機票時，職員更直接要她去櫃枱即場買張新機票回港。不少朋友都試過在香港、日本、台灣錯過班機時，可補錢買下一班，相比之下，法國職員態度非常冷漠又不helpful。而事主因為任職教師，一定要準時回到香港，情急下只能現場買機票。
中伏位6：現場買機票 索價1萬
去到指定的櫃位詢問機票詳情時，職員表示最平的機票都要1萬，由於要趕著回香港上班，事主情急下硬食貴價1萬蚊！不過，如果大家遇到同樣情況，記得先唔好咁慌張，可以上各大航空公司check下機位，事主捱完貴機票之後，上國泰睇再有HK$5,000機票，好肉赤！
中伏位7：保險竟然唔包！
出發之前有買保險的網友即問保險公司有冇得賠，結果發現所買的保險只會因罷工、劫機、恐怖襲擊、天災先有得賠，更加心痛。保險公司強調，如果係車輛故障，都一定要延誤足8個鐘，先開始有得賠，就算有機場信證明都冇用！不過坊間每間保險公司的準則都唔同，建議大家遇到故障、停駛等，立即攞咗官方確認信先，話唔定都有得claim。大家買保險之前，都記得要問清楚有咩包、有咩唔包呀！
5招教你 對付麻煩機場
唔想好像事主咁中晒伏又損失金錢，編輯部訪問了旅居巴黎多年的博客Zenobeebee à Paris的意見，以及旅遊記者的心得，整理以下應對戴高樂機場的實用小貼士。
Tip 1. 點對點pick up 服務
有時候要預時間去機場，又要搵轉車路線，又要推重重的行李，不如預多少少budget揀點對點pick up 服務。旅居法國多年的博客Zenobeebee à Paris，推薦 Viator 的Shared shuttle，大約一人EUR18-27，雖然有機會同其他乘客同坐，但勝在司機準時，態度又好，就唔使提心吊膽！
Tip 2. 一定要提前online check-in
好多旅人出發之前都會做online check-in，但去到回程玩得太開心，就懶到唔記得要提早check-in！其實回程先係做online check-in的最關鍵時間，因為好容易買多咗買爆喼，check-in要排，搞行李又要時間。如果已經提早做好online check-in，就可以排機器攞登機證，行李都可以自助託運，節省好多時間。
Tip 3. Check定航廈最重要
正如上述所言，3個航廈之間不是步行可以到達的距離，去錯咗分分鐘要一個鐘以上先去到！唔想重複犯錯，出發前上航空公司check定辦理登機位置就最好，較多飛往香港、上海的航空公司，都是T2登機，大家可以注意一下。另一個情況就係轉機，都要事前確認自己去邊個航廈，有好多時候轉機時間得1個幾鐘，上一班機delay，而下班機唔會因此延遲起飛，時間緊湊，一定要做好準備！
Tip 4. 盡早出門為好
經常來往法國的Zenobeebee à Paris，每次都起碼早兩個小時去到機場，她強調法國安檢慢起上來可以非常慢，歐洲人除衫攞嘢更加係超慢動作，bag drop 隊伍往往都是超長，地勤手腳又好慢，有時又會突然封了安檢口，狀況百出，千萬唔好以香港的速度為基準！如果是第一次迎戰戴高樂機場，早3小時就比較穩陣。加上機場內有很多名牌，可以用免稅價買到，辦理完登機，去逛逛也是不錯的選擇！
Tip 5. 退稅要做足準備
Zenobeebee à Paris強調，想退稅的話，更加要提早出發，因為要畀海關蓋印，而好多時就算排咗百幾人，都可能只開兩三個櫃枱，隨便一排都要一個鐘以上，有唔少網友都分享，早4個鐘去到都只係時間剛剛好，一啲都唔鬆動，絕對要小心！
