神就是不一樣！ Rimowa 喼神 特別多災多難的行李喼都市傳說 ＠杜遊珍
撰文：杜遊珍
都市傳聞01｜喼神=易碎物品？
根據當事人D小姐以及不少最近搭國泰的喼神用家朋友所述，原來國泰的special care就是check-in時在行李喼掛上「Fragile」的吊牌，再交到大型行李櫃枱寄艙，同其他oversized行李及BB車為伴，而非平日般check-in時直接放上輸送帶託運。打聽過現職國泰地勤的員工，新措施3月中才實施，雖然有關方面並沒有正式公佈，但新指引話所有 Rimowa 都要掛「易碎Fragile」牌，希望處理行李的人會小心啲。雖然篋神獲得厚待，但D小姐個篋都係爛咗囉！
編按：4月10日更新－－CX「厚待」Rimowa的訊息經傳媒轉載報道後，國泰內部再出新通告，表示撤回特別措施，職員只要為行李貼上普通行李牌就可以，無須特別「關注」！
都市傳聞02｜篋神=有爛即場換？
你可能問：「點解得 Rimowa 先有？家陣係咪差別待遇先？」嗱，叫得做喼神都因為多人熱捧，再加上價錢昂貴，用家自然錫住用。有業內人士推測過往有太多人因為外殼刮花、撞凹等問題而提出索償，導致航空公司出此下策。江湖有傳國泰行李服務櫃枱放定一大堆新篋神，有朋友就試過行李篋損毀太嚴重而即場獲贈新喼一個，仲要係相同的型號，當中唔排除有人渾水摸魚，專登攞個爛喼博賠償，莫非就係咁使大咗條數要出招止血？
都市傳聞03｜喼神=仇富陰謀論？
地勤朋友再爆料，的確不少處理行李的員工都特別憎恨喼神。「你咁硬淨，就掟俾你睇！」喼紅果然是非多，回顧過去，喼神久不久就見報，最經典是幾年前有資深旅遊領隊因為心理障礙，對喼神有特殊癡戀，9個月內在行李領取大堂合共偷取12個喼神返屋企！亦有傳聞行李部機組人員，見到貴喼就忍唔住粗暴對待，孰真孰假好難證實，但強國曾經就有報道話：「碰到中國的機場員工，喼神就是會壞！」代理更稱傷亡報修名單有9成來自首都機場，唔⋯⋯喼神用家們出入北京記得用紅白藍好喇！
都市傳聞04｜喼神=高科技尖端？
雖然傳聞多多，去年被LVMH收購後仲越賣越貴，但喼神又確實有一手，率先推出具有電子標籤託運功能的型號，只要連結航空公司及品牌的手機apps，透過喼上的電子標籤就可在家中完成託運行李程序，減省平日在機場check-in時用人手處理磅重、印製及貼上行李標籤的時間，但問題是這項高科技功能受制於航空公司同機場的相關設施，目前只得喼神同鄉德國漢莎同長榮用得着，未知CX下一步會唔會諗住配合呢？
