Asia Miles換機票新制2018！20,000里去大阪/首爾/北海道＠小斯

撰文：小斯｜圖片：Asia Miles、新傳媒資料室｜編輯：f（原文刊自Flyformiles）

01｜換日韓機票 30,000里變20,000!

今次改制可謂普天同慶，最熱門嘅日本、韓國來回機票由30,000里減到20,000里，足足減咗成10,000里！無論是去東京、大阪、首爾甚至北海道，新制下統統只要20,000里，以前換到2人變成3人，減幅最勁！

02｜20,000里仲可以飛新加坡、布吉、峇里

在新制下，除了日韓之外，原本要30,000里兌換變成20,000里的航點增加不少，港人旅遊熱點如布吉、新加坡、吉隆坡、峇里、檳城、加德滿都、仰光等東南亞城市，都減足10,000里！

03｜長途Econ減里數航點包括澳洲、美東

另外澳洲、以色列來回航班，由45,000里減到44,000里，減咗1,000里；歐洲同美加西岸不變，但美加東岸就由90,000里減到84,000里，減咗6,000里咁多！

04｜兌換單程機票里數減至來回一半

以前無人會用Asia Miles 換單程機票，因為所需里數係換來回里數嘅三分之二！如舊制下來回台北所需里數要20,000，但單程機票所需里數就要15,000；於新制下，單程機票只需要10,000里，假如買到平嘅廉航出發(去台中)，回程換單程機票就抵好多！

假如只買到平的單程廉航去曼谷，可以考慮用里數換回程，包30kg行李，狂掃貨都唔怕。

05｜換單程商務艙更有彈性

另外單程獎勵機票所需里數改為來回機票嘅一半亦有另一個好處，就係喺舊制下，如果你想換一套來回商務機票，你想要嘅日子有一程係無business而你又逼住坐econ的話，你都係要畀來回business嘅里數，但宜家就唔係，因為你可以分開兩個單程換，一程換econ一程換business，咁就唔使畀咁貴里數啦！

06｜搭國泰/港龍賺取里數增加

由6月22日起乘搭國泰及國泰港龍航空可賺取的里數，將由實際飛行距離改為以飛行距離區域計算！於新制下，透過乘搭國泰 / 國泰港龍航空賺取里數嘅計算方法取決3樣嘢，第1係客艙級別 (cabin class)，第2係「子艙位」(Fare Class)，第3係飛行距離區域。Asia Miles表示有80%機票會賺多咗里數！

例子1：坐Econ香港去台北(單程)

舊制下根據實際飛行距離可以拎到125-501里，但由於新制係以飛行距離區域計算，故此於新制下可以拎到330-650里，比舊制多！其他艙等所賺的里數在新制下亦有增加。

例子2：坐Econ香港去台中(單程)

如果去台中的話就更誇張，例如Y Class嘅香港單程去台中，舊制下根據實際飛行距離只可以拎到447里，但於新制下嘅飛行距離區域計算，就可以拎到650里，比舊制多接近50%！

以下是更多新制下賺里數的例子：

07｜可換機位加20%

不少人投訴用里數換機票勁困難，數量很有限，有見及此，Asia Miles稱將國泰與國泰港龍可供兌換的獎勵機位增加20%，希望大家可以更容易換到心儀機票出發。

08｜轉機/停留限制更有彈性

獎勵機票轉機/停留規則，來回機票由2個停留(Stopover)+2個轉機(Transit)+1個終斷行程(Open jaw)，最多6程機(Sector)，改為1個終斷行程及停留/轉機數次不限（最多4程機），即是說：

來回機票（新制）
– 最多4個sectors
– 容許最多1次於起點或轉乘點作Open jaw (如在起點作終斷行程，必須屬於同一國家不同城市，例如起點係東京，回程點係大阪)
– Stopover或Transit數目不限
– 如行程中途已返回出發點，行程則即時結束！故此舊制嘅同一里數換兩個旅行呢招已經係用唔到！

新制表面上可以換到嘅航班數目少咗2程，但實際分別不大，因為你都唔會想轉2程機吧？同埋由於宜家停留及轉機數目不限關係，大家就唔使好似以前咁，想玩3個地方的話就逼住有一程要open jaw，宜家反而可以3個地方都停留晒，彈性更大！

例子1：香港－台北－大阪－台北－香港

新制下來回最多4程機，即是可以玩足3個城市，而在飛行距離不超過5,000里，換以下呢套機票只要20,000里！

舊制下，30,000里可以換到來回日本 + 來回台灣兩個trip，但其實一次過要你換晒兩個trip好辛苦，一來定唔到時間，二來有少少好似覺得唔換埋會蝕咁！新制減價至20,000里換到來回日本機票，想玩長啲仲可以停埋台灣玩！變咗彈性更大！唔會有種逼你去旅行嘅感覺！

例子2:香港-大阪

新制下單程最多2程機，只要目的地不變，中間Stopover或transit 1次都是相同里數！

單程機票（新制）
– 最多2個航段 (sectors)
– 容許最多1個停留(stopover) 或 1個轉機(transit)

09｜兌換機票日期由360日前改為353日

新制下將透過優先預訂機票嘅提前日子大大提升舊制嘅優越機票地位！新制下亞洲萬里通 Asia Miles 獎勵機票將分為以下三個類別：

1.標準賞

獎賞機票最少，優先預訂機票只限於353日前，比起以前360日前後少咗7日，而且優先座位選擇只適用於特選經濟客艙以上，即係換ECON無status就唔畀揀位。

2.靈活賞

所需里數較標準賞多，但獎賞機票亦較多，優先預訂機票可於360日前，比標準賞早7日，但優先座位選擇一樣只適用於特選經濟客艙以上，即係換ECON無status就唔畀揀位。

3.隨心賞

所需里數最多，但獎賞機票亦最多，優先預訂機票可於360日前，比標準賞早7日，優先座位選擇亦適用於所有客艙，即係換ECON都可以揀位坐。

貼士：換旺季機票以靈活賞/隨心賞成功機會較高

新制下用標準賞只能夠於353日前換機票，故此用靈活賞及隨心賞換到機票機會會大增，尤其係旺季，例如聖誕農曆新年呢啲旺季特別有用！當然所需里數也當然會提高，如香港來回東京，Econ機票標準賞是20,000里，但靈活賞就要30,000里，跟舊制一樣，所以呢個算幾抵換！

10｜兌換特選經濟/商務/頭等請及早行動！

新制下，經濟艙大部分都有得減，但特選經濟(PEY)、商務或頭等艙，都會輕微至大幅度加價，尤其是長途高等艙位加幅最多！里數富戶如果要換機票的話，6月22日是死線！

重災區1：特選經濟艙

貴艙等加價都係意料之內，但Asia Miles都好佛心，日韓個Tier居然完全無加！不過我估大家換得PEY嘅都會係換去歐洲，原本72,000里加到80,000里，我認為又唔係話真係加好多，都只係8,000里！但美加西岸嗰邊真心加得犀利，加咗成18,000里！只能說想長途機坐得舒服啲，係要付出代價！

重災區2：商務艙

商務艙加幅同特選經濟艙差唔多，都係10,000至20,000里，Asia Miles一樣非常佛心日韓個Tier，都係無加價！但值得留意，其實一旦換長途嘅Business機，如飛歐洲的長度，大約行程要13,000至14,000距離左右，都已經要130,000里！再誇張啲去美加東岸的話，就要170,000里，相對換「寰宇一家」聯盟成員獎勵機票 Oneworld Multi-Carrier Award 會抵一點。