新加坡航空請空姐 入職月薪近3萬！好過選港姐 挑戰最窄最低胸制服
廣告
機會嚟喇飛雲！新加坡航空宣布在香港招聘空姐及空少，月入連津貼可以高達$29,000，更可享1折-25折買機票福利，每年仲有1套免費機票任擇地點出遊，比起國泰或港龍人工高逾40%！不過要做服務非常講究嘅SQ菇（crew），背後有咩辛酸、份工係咪超筍？
撰文：杜遊珍｜相片：新加坡航空
最貼身的Singapore Girl制服考驗
多年沒有在港聘請空姐空少的新加坡航空，今年終於開放畀港人申請！撇除人工福利唔講住，新航服務一向高水準，對空服員要求嚴格，尤其空姐件制服在業界來說堪稱最貼身，傳聞唔少空姐都為了件制服努力keep住身形！
有現職空姐稱，這件度身訂造的制服其實都有啲彈性，工作時尚算活動自如，低領位因為度身訂造關係，不容易走光，同埋長裙叉位其實可以拉高，在緊急時候可以綁至腰間，不礙逃生，至於保持體型方面，亞洲地區空姐普遍都有潛規則唔可以加大碼㗎啦！所以聽聞今次面試，立即有埋uniform test，想報名嘅要開始keep下先！
英文要流利 化妝set頭勁嚴格
今次新航請香港crew，其實有需要間中base响新加坡的，所以執飛的航線唔局限香港～新加坡同香港～舊金山呢兩條，隨時飛好多東南亞、歐洲同澳洲航點，英文好就預咗㗎喇，但睇過關於新航空姐嘅documentary，新航仲有其他外語training如德文、法文或者關於侍酒的專業培訓畀空姐入職後揀來讀，當然要考核唔係興趣班咁輕鬆啦。
新航空服員入職的培訓為期14星期，除了要接受飛航安全、機艙設施、急救應變等「空姐101」職能訓練， 化妝儀容、談吐溝通及對客禮儀都幾嚴格，髮型、髮髻大小、眼影顏色都有特別要求，Singapore Girls名銜絕唔容易carry㗎！
福利比香港高 不設聘請名額
實際啲，講人工，新航原來幾闊綽，人工連津貼每月約有新加坡幣4,500-5,000元（約港幣26,400-29,300元），比起國泰同港航高大約4成；福利除咗一樣有1折機票，新航員工每年有1套免費機票，相比國泰同港航有4-5套相對較少。打聽過，今次聘請不設名額上限，interview啱嘅都會請去受訓，入職可獲5年合約，之後再按表現review，阿珍覺得好過選港姐之後拍埋啲爛劇囉！
