海南雞飯＋金菇牛肉卷＋西瓜啫喱｜搵食新煮意（新假期APP限定）

5月23日搵食新煮意：海南雞飯＋金菇牛肉卷＋西瓜啫喱

1. 海南雞飯

海南雞飯 ，認真做起來，浸雞、煮湯、炒油飯，相當花工夫，出去食好過！發明電飯煲的日本人，就流行用電飯煲一煲過做海南雞飯 ，今次就用他們的食譜，加以改良，以輕易買到的東南亞香料，做出香口惹味，不輸餐廳的簡易版海南雞飯。

材料：

• 雞髀 2隻
• 泰國米 2杯
• 雞湯 2杯
• 料酒 15ml
• 香茅 2支
• 蔥 2條
• 紅蔥頭碎 1碗
• 蒜蓉 適量
• 薑片 2片
• 薑蓉 1小碟
• 鹽 適量
• 胡椒粉 適量
• 黃薑粉 適量

做法：

1. 雞髀切去多餘油脂，留起備用。在雞髀肉上插數個小孔，加鹽和胡椒粉醃半小時。
2. 用留起的雞皮雞肥膏起鑊，加入紅蔥頭粒和蒜蓉炒至轉色起鑊，並去掉雞皮雞肥膏。
3. 電飯煲中加入洗淨的白米，加入紅蔥頭和蒜蓉拌勻，再依次加入薑片、香茅、蔥，再將雞髀放面，並倒入雞湯和料酒，最後灑上少許黃薑粉加蓋，開動煮飯模式。
4. 趁海南雞飯煮起前，製作薑蓉。薑磨成蓉後，加少許鹽，再淋上少許滾油即成。
5. 當飯煲轉至保溫模式後，再焗5至10分鐘，開蓋去掉香茅、薑片和蔥，將飯拌勻，雞髀放涼斬件。
6. 油飯置於碗中，再蓋在碟上，斬件雞髀擺邊，可再加上芫荽、青瓜片作配菜享用。

2. 金菇牛肉卷

金菇牛肉卷簡直是懶人恩物！這道家常菜屬新手入門級，只需2種材料，加上日式醬汁，5分鐘內零失敗！金菇爽口，牛肉煙韌多汁，令人食到冇停口，即睇點煮金菇牛肉卷！

材料（2人份）：

• 肥牛 100g
• 金菇 半包
• 日式醬油 2湯匙
• 味醂 2湯匙
• 料理酒 2湯匙
• 糖 1湯匙

做法：

1. 以肥牛捲好金菇。
2. 燒熱油後放進金菇牛肉卷，開口向下落鑊。
3. 用中火煎30秒後，轉另一面。
4. 倒入汁料。
5. 煮至金菇軟身，醬汁濃稠即可。

3. 西瓜啫喱

天氣熱得緊要，每天都感覺自己在火爐內生活，開大冷氣都只能夠冷卻核心外圍，但內裡還是熱到暈喎。老人家話要由內涼到外，就必須由飲食幫助，即係要食涼透心食物？但涷冰冰的，多數都一堆糖，唔多健康喎。。。不如試下這個全天然的西瓜啫喱 ，味道來自西瓜汁，稍為加工一下，變成人見人愛的啫喱，用來宴客，一點都不失禮！

材料：

• 西瓜 1個
• 魚膠粉
• 朱古力粒

做法：

1. 西瓜切半或大半，適隨尊便。
2. 挖出西瓜肉，留意不要弄破西瓜皮。
3. 用叉稍為將西瓜肉弄碎，隔去西瓜汁，留用。
4. 用攪拌器將西瓜肉打碎，隔去西瓜汁。
5. 取出少許西瓜汁，加入魚膠粉，隔水煲至完全溶解。
6. 將帶有魚膠粉的西瓜汁跟大份西瓜汁混合，徹底拌勻。
7. 放回西瓜皮內，放雪櫃約4小時至凝結。
8. 取出西瓜，切去多餘的西瓜皮，將西瓜啫切件。
9. 插入朱古力粒，攪掂～