【記者直擊】銅鑼灣Pokemon嘉年華！比卡超免費見面會、勁舞表演＋3大影相位+6大免費Pokemon遊戲

Apr 30 2018

「比卡超！我要收服你」玩Pokemon Go「求其」掟個精靈球都可以收服到佢，但今次唔係講玩，因為銅鑼灣Pokemon嘉年華的這隻比卡超，有成5米高，想收服佢難過收服女神呀。好彩嘉年華除了3大影相位，還有18場免費抱抱見面會，可以同比卡超近距離自拍，還有6隻比卡超勁舞。亦有6大免費攤位遊戲讓你贏200款Pokemon貼紙，更有20款小精靈印仔，大人細路都啱玩，簡直是Pokemon粉絲的天堂！

撰文：Keith ｜拍攝：Man

比卡超迷必影 3大打卡位！5米高「童顏巨鼠」比卡超

Pokemon嘉年華將於1/5起至10/6，在銅鑼灣時代廣場舉行。今次活動內容包羅萬有，有得玩有得影有得睇。現場最搶眼的一定是時代廣場鐘樓旁5米高的吹氣比卡超，身為電氣鼠小精靈的比卡超，巨大得來超可愛，真的是「童顏巨鼠」呀！而旁邊就是滿是精靈球和寵物小精靈的Pokemon小屋，雖然主打是屋內的攤位遊戲，但屋外的布置都是影相位，有齊百變怪、喵喵怪等初代精靈。而最後旁邊更有四隻1米高的比卡超，細細隻可以「扮」攬住影。

18場免費抱抱見面會+勁舞表演

除了影相位，另一個謀殺菲林的環節就是比卡超抱抱會及勁舞表演。在5月5至20日期間的6個周末，會有18場抱抱見面會。而5月26至6月10的6個周末，亦有比卡超勁舞表演，最重要是免費參加，不需額外消費，你肯排隊就可以了。見面會可以近距離跟比卡超自拍，而勁舞表演更一次過有6隻比卡超出場，為你彈彈下，表演勁歌熱舞呢！

任玩Switch Pokemon遊戲＋6大免費寵物小精靈攤位遊戲

影完相，睇完表演。係時玩下放下電。於Pokemon小屋內有6款免費寵物小精靈攤位遊戲，包括玩釣水系精靈如背背龍、鯉魚王的「幸運拉到寶」、精靈球彈珠台「森夜捉迷藏」、射爆耿鬼的捉鬼遊戲的｢暗黑影子球」、用精靈球球拍玩的「拯救水彩球」以及「小火球攻擊」！而最痛快又最殘忍的一定是用彈弓射出比卡超的「十萬伏特電擊」！