搞笑、貼地又抵死！全球網民共同參與 英文網上詞典製作
廣告
Hip Dict，係一本令日常用嘅英文有全新定義嘅詞典。雖然個名叫詞典，但每個字嘅解釋都夠晒貼身，同時又好抵死。返工返學返到有啲灰心嘅時候，不妨睇下、笑下！
撰文：Tana ｜圖片來源：Ig@hipdict、網上截圖
Hip Dict 原來係9GAG個仔！
其實Hip Dict 前身正正係8Dict，一個9GAG 4年前成立嘅實驗品，本來係9GAG編輯自家創作嘅內容，開始咗同使用者合作之後，就接受投稿，如果有搞笑嘅idea都可以試試投稿去Hip Dict！
記者精選咗啲私心推介，覺得比起字典入面嘅解釋，更貼地、更生活！
女人最怕嘅生物、萬惡嘅根源
卡路里：一種微細生物寄生喺衣櫃，每晚都會將衣櫃入面嘅衫縫細小小。
驚，係miss咗阿媽或女朋友 20個來電
恐懼：使用者名稱或密碼輸入錯誤，「我哋需要傾下」，20 個來自媽媽的未接來電。
（尤其係「我哋需要傾下」，真係會嚇到個心跳出嚟，跟住所有做過嘅虧心事會好似走馬燈咁，係腦海轉一次。）
一種每個學生都會做嘅宗教儀式
溫習：send 訊息/食嘢/睇電視，同時有本開咗嘅教科書喺附近。
（就好似一個宗教儀式咁，開咗本書喺附近，跟住做咩都會心安理得啲。）
又要問我意見，做就做相反！
問題人士：嗰個成日問你意見，但每次都做相反嘢嘅人。
（咁不如一開始就唔好問人攞意見。）
講就天下無敵，做就無能為力
改變世界：個個都掛在口邊，但係冇人願意換咗用晒嗰卷廁紙。
（同樣可以套喺pantry入面，嗰支永遠冇人肯換嘅礦泉水。）
一場用人生做賭注嘅賭博
賭博：當鬧鐘響嘅時候，熄咗佢，同時合番埋對眼。
（尤其係冬天，差唔多每日都要賭一賭。）
如果有興趣想再睇多啲，可以去呢個網址：www.instagram.com/hipdict/
