173 — 在未有 ThisAV 之前……@ 梁栢堅

<173>——在未有 ThisAV 之前…… – 梁栢堅

呢啲露骨廣告，當年份份報紙都有，大小朋友一齊浸淫喺充滿創意文字之中，當年嘅寫手，唔少係鹹版主筆，用字抵死，勁過今日高登仔。創意工業，非此莫屬。我細細個就已經覺得呢個可以係終身職業，鹹濕可以搵食，唔係咁爽呀?

173收費好似好平，每六秒只係六亳，但問題係，有邊個會剩係聽六秒? 九十年代嘅中學生，一定有啲富貴同學，屋企有IDD，然後放學一齊上佢屋企開SPEAKER聽，滿足一下青春嘅慾望，之但係，月尾張電話單，係屋企人找嘅，當年唔少朋友比屋企發現，點解會多咗一千幾百蚊月費。

都市傳說: 打去把女聲，一定好聽，但傳聞中，其實係肥師奶喺CALL CENTER坐住摺凳，踢住拖鞋同你傾，即係魯芬同你FLIRT咁樣。如果當年有FACETIME，呢個行業已經死亡。係，見識過廚房，餐廳好多嘢你以後都唔敢食。

唯一提過173嘅廣東歌，就係廿幾年前軟硬嘅<鈴通天地線>，一首歌，已經講曬當年 173盛況。不過咁，有朋友表示早年嘅173真係識到高質人，嗱真係朋友唔係我。

今日嘅後生仔，一定覺得呢啲電話低能，明知假，都用大筆錢去聽。但請記住，喺未有網上嘅年代，任何J界資訊，都係要真金白銀買嘅。阿叔永遠都含淚講: 依家啲後生真幸福。