懶人露營計劃！加推2.0版本 豪住大帳營
廣告
放假想去郊外吸下新鮮嘅空氣，除咗行下山郊遊下，仲可以考慮去 露營 。但每次諗到露營要準備一大堆嘢心機都無哂，如果有人可以準備哂露營嘅嘢就好啦！呢個世界有冇啲咁筍嘅事？原來係有㗎！香港青年旅舍之前推出「兩手FING-FING去露營」計劃，幫你準備哂露營嘅嘢，而家除咗摩星嶺旅舍有之外，大嶼山嘅昂坪戴维斯青年旅舍都有。
每人百幾蚊就可以去到郊區 露營 ，仲可以有人準備哂所以嘢，係爽喎！嚟到昂坪可以順便去埋附近天壇大佛等。除咗呢款營，佢哋最近仲加推咗個2.0露營版本，引入歐洲流行嘅Bell Tent，一個營最多可以容納到十個人，啱哂一大班人去玩！
$130 露營 新手必玩
露營都可以兩手Fing Fing唔使拎住一袋二袋？其實又唔係完全咩都唔使拎，事關百幾蚊只係包括已經搭好嘅營，同可以無限次使用旅舍入面嘅廚房同淋浴設備，食材方面就要自己準備啦。如果唔想買定嚟煮呢，旅舍都有小賣部，有提供各式飲品、即食麵、罐頭食品等，去到買都得嘅。
2.0 加強版豪華露營 最多可容納十人
香港青年旅舍最近引入咗歐洲流行的Bell Tent，佢比起平時一般帳營大4-5倍，最多可以容納到十個人。入面仲準備好哂枕頭、床鋪等，一大班人嚟玩就啱哂，熱鬧得嚟又好玩。
外觀係純麻色，走波希米亞風，同時間又好似一個馬戲團帳幕。（官方圖片）
同樣地，住客都可以無限使用旅舍入面嘅廚房同浴室設備，煮下嘢食，睇下夜空，爽！
昂坪戴維斯青年旅舍：兩手FING-FING去露營
地址：大嶼山YHA昂坪戴維斯青年旅舍（顯示地圖）
旅舍接待處的開放時間：7:00AM – 11:00PM
查詢熱線：27881638
預訂方法：填好表再交去香港青年旅舍（表格及預訂詳情）
價錢：會員價港幣$130（特惠時段） / $150（繁忙時段）
參加人數：2-4人（每營）（計劃需二人以上參與）
兩手fing-fing去露營2.0：豪住Glamping！
價錢：1-3位：總數港幣$560（特惠時段） / $630（繁忙時段）
其後每位另加港幣$130（特惠時段） / $150 （繁忙時段）
（每4位須有1位為YHA會員，如此類推）
預訂方法：
1. 致電2788 1638
2. 電郵至 [email protected]（請附上預訂表格）
