震驚七百萬人的垃圾灣！ @GoGreen
廣告
我對鶴咀的印象，係遠離市區繁囂的海角，有奇石、燈塔、炮台、機槍堡，仲有無敵靚海景，係周末避世好地方——直至我穿過山路，見到佈滿垃圾的「垃圾灣」為止……
高空望落嚟係咁的（片段由世界自然基金會香港分會提供）：
天晴去鶴咀本來好興奮，但此行目的其實係跟WWF去（應該係）香港最多垃圾嘅海灣。咪以為記者工作時有得睇海景好爽皮，在烈日下俾垃圾酸臭味薰足三個鐘，放工後只想成個人跳入洗衣機！至於垃圾量真係冇呃人——在海灣近岸地方行走，隻腳根本到唔倒地，唯有在垃圾堆上小心翼翼地走動，稍為差錯腳的話，唔單只會踩玻璃、踩死魚，垃圾堆最深超過60cm，仲會成隻腳踩埋落去！據WWF當日調查，120m×30m的小海灣，竟然有超過185公噸垃圾，需要46架垃圾車先可以全部運走！
個海灣咁多垃圾，你可能會問點解嘅？（吳若希tone）原来海灣向東，而香港¾時間吹東風，所以海上垃圾隨風同水流漂到，加上位置偏遠，又唔係旅遊景點，所以食環署極少嚟清理，日積月累就成為一座垃圾山！
可能你覺得垃圾灣咁遠唔關你事啦，但唔清走垃圾，不但污染海岸生態環境（事實上鶴咀係香港唯一一個海岸保護區），而且會被海浪捲返落海，啲魚咬咗食咗落肚，垃圾中的有害成分會隨魚類進入食物鏈，最後咪又係我哋受害！
至於垃圾堆中以塑膠最多，佔89.0%。當日9個義工在30分鐘內執咗2,064個膠樽，都只佔極少部份。除咗政府要努力外，大家幫下手減用膠嘢，由源頭減廢啦！
