明天（8/7）開！銅鑼灣LEGO Store 正過旺角店睇時代廣場前身電車廠街景＋LEGO盧海鵬打小人

Jul 7 2017

銅鑼灣LEGO Store 將於明天（8/7）在時代廣場開幕，新店雖然沒有旺角店大，但卻有更多驚喜位。今次同樣邀請了LEGO大師洪子健花了25萬粒積木，還原80年代時代廣場一帶街景，更砌出商場前身的銅鑼灣電車廠、鵝頸橋、羅素街街市及登龍街大排檔，當中的電車更識行識走，比旺角店的街景多元化。店內更有不少遊戲，例如LEGO度高、LEGO人仔影相位等等，影買玩齊集！

撰文：Keith ｜拍攝：Man

銅鑼灣LEGO Store 好玩過旺角店

繼旺角店，全港第2間LEGO Store相距近一年，終於在明天（8/7）落戶銅鑼灣時代廣場。雖然新店不及旺角店大，好在不用過海，港島人夠方便。當然七彩積木「百子櫃」等基本嘢都有齊，貨品亦會和旺角店同步。最重要是銅鑼灣LEGO Store 新鮮感十足，有數款免費小遊戲，大人購物，另一半或小朋友都不會悶，記者認為這是比旺角店吸引的地方。這裡都有當區積木街景，今次就重現了時代廣場前身的銅鑼灣電車廠，後生仔可以開開眼界。

睇！時代廣場前身電車廠街景重現港產片情節

一如以往，街景由香港LEGO大師洪子健（Andy）製作，花了兩個月，用了25萬粒積木砌成。場景比旺角店的西洋菜街模型規模細，但反而做得更精緻。由於時代廣場的前身是銅鑼灣電車廠，故他們決定重現80年代這一帶的城市景色，包括電車廠、鵝頸橋、羅素街街市及登龍街大排檔。由於模型包括了汽車及樓房，Andy為了更精準，便邀請了一名巴士迷及一班精於砌建築的高手，合作製作唐樓群及巴士。
最特別是Andy特意加入了港產片情節，如盧海鵬音音姐打小人、葉問天台打詠春等，玩味十足。而這一帶原來和他有淵源，Andy說：「我祖母正正住在附近，我細細個在這裡長大，日日見電車廠、羅素街街市等，在今次製作上很有幫助，而且更具珍貴回憶。」

橋上有6架巴士，是一名同時是巴士迷的LEGO迷出手相助製作。

玩！LEGO度高睇你等於幾多粒積木

當另一半成個大細路在瘋狂購物，你亦有免費小遊戲解解悶。新店比旺角店多嘢玩，記者最喜歡LEGO度高，可以知道你等於多少粒LEGO，而最常見的「2 x 4積木」約1cm高，故像我183cm就等於約180粒積木。另外亦可使用LEGO Store 手機App，掃描店內海報，就會在手機中出現真人大小LEGO人仔，還會做動作跟你影相。