銅鑼灣 食乜好│10間精選特色中、日菜 ＠Dining娜

Photo：Him（部分）

全年頭3位最重要嘅節日，相信非母親節莫屬，各位乖仔乖女諗好點同媽咪慶祝未？食咩都好，最緊要就係預早訂枱，或者提前慶祝喇！否則到時要周圍撲位，母親大人肯定覺得你辦事不力！據我Dining娜喺不同飯局群組嘅非正式統計，最多媽咪鍾意食中菜，近年唔少中菜都加入fusion元素，睇得又食得；至於潮媽，通常最like就係日菜！等我今次來個中、日菜結集啦，全部喺晒 銅鑼灣 廣場2期超方便，冇位的話，樓上樓下都可以搵食，媽咪肯定俾個like你！

和風烤肉、放題

香港人最愛食放題，潮媽當然亦唔例外，無論係任食日式烤肉、火鍋，抑或刺身、壽司等日本料理美食，都咁啱胃口，食完個個大滿足。

德家日式燒肉、德興日式放題鍋

兩間店同樣以靚牛馳名，佢哋有極上牛肋肉、牛脊肉、牛舌、牛胸腹等多個牛部位供應，放題嚟講都幾巴閉。另外，無論係燒肉定shabu shabu，都有好多海鮮選擇，當然仲有刺身啦，仲好新鮮添！

滿屋日本料理

呢間日式放題嘅刺身夠新鮮，食過之後，發現赤蝦係首推之選，大隻之餘，仲好鮮甜，其他熟食同小食選擇亦好多。最開心係呢度放題有成3粒鐘（一般只得2個零鐘咋），可以同媽咪邊歎邊談心。

極尚大瀛喜日本料理

除咗新鮮刺身、壽司之外，呢度最吸引食客嘅係佢嘅燒物，不論燒羊架、帶子，抑或鰻魚，通通都係人氣之選。

潮食特色中菜

唔好以為食中菜就係老土，相反近年好多中菜都好有創意，無論賣相定食材配搭都大玩fusion，絕對可以潮住食中菜！

潮江春

雖然係潮州菜，但注入咗新派元素，以「正宗潮菜、現代演繹」為烹調理念，菜式既有創新款式，亦不乏傳統潮式美食。潮菜菜式同滷水美食，例如好百年滷水鵝片、潮州家鄉煎蠔烙、砂鍋普寧豆醬雞、潮州黃金煎伊麵等等，都係出名嘅鎮店主打美食。

盈福28

以摩登中菜而馳名，佢哋嘅創意點心更係好味、得意吸睛，兼呃like度高。食材配搭既新穎美味又健康冇味精，呢度最近仲有抵食優惠：主餐牌8折、玉桂香鴿$38，一於約定下次呢度飯敘先！1人午餐只係$69起，啱晒OL喎。

名苑酒家

名苑善於烹調傳統古法特色菜，同時又有不少上海菜，清宮明火雞煲翅、上海千葉滑豆腐、京川滑餃子、乾清棗皇糕等等，都係經典招牌菜。呢度嘅菜式出名以健康為主，所以尤其深得中菜食客歡迎，唔少特色菜同矜貴菜式都糅合健康元素，好似亞麻籽即燒荔枝雞、藜麥宮廷皇燒翅，都好有口碑。

富東海鮮酒家

由「鮑魚大王」楊貫一徒弟林永春師傅主理，堅持用原汁原味、不加味精製作鮑魚，除咗扣吉品鮑魚，1道慈禧最愛嘅宮廷菜「御用鮑魚寶貝雞」亦係呢度嘅招牌菜；炒魚翅都係水準之作。林師傅經常推出新菜式，例如咖喱香草羊架、花雕蒸龍蝦都加入fusion意念；創新點心就有養生杞子卷同皇帝帶子餃。

傳統經典粵菜

經常覺得粵菜係我哋嘅comfort food，煮得出色到家，簡直有食住家飯嘅感覺。

翠園

一向以傳統手工粵菜見稱，既保留昔日巧手廚藝，同時菜式創意亦與時並進。招牌名菜三味蝦球同蘭度銀杏生魚卷，都係人氣之選，風格創新，賣相非常吸引。點心方面，花膠瑤柱灌湯餃、原隻鮑魚荷葉飯、筍尖鮮蝦餃都係午市熱賣。

太湖海鮮城

呢間太湖榮獲7屆「米芝蓮美食推介餐廳」（2009-2011年、2013-2017年），以及旅遊發展局頒發嘅「美食之最大賞」等，獲獎無數。鎮店名菜桂花梅子燒鵝皇，更由得獎師傅親自主理，燒鵝混入桂花同梅子嘅清香，風味獨特，亦唔會有油膩感。

飯前飯後小hea

同媽咪行完街未夠鐘食飯，又或者食完飯想飲番杯嘢，一於去Starbucks啦！呢間位於銅鑼灣廣場2期2樓，一上扶手電梯就到，非常就腳。

Starbucks

最近推出咗新口味冰涼飲品——爆谷蝴蝶圈咖啡星冰樂，將星冰樂配上兒時最鍾意嘅零食蝴蝶圈，再加上爆谷，驚喜度十足。

銅鑼灣廣場2期

地址：銅鑼灣駱克道463-483號（港鐵銅鑼灣站C出口）（顯示地圖）

泊車：附設停車場，B2樓設有2個中速充電裝置。