【非常索銀模】 銀髮模特兒 58歲行貓步 34年後圓夢

text : 寶 | photo : Wing

相片裡的 銀髮模特兒 （下稱銀模），個個五、六十歲， 都是模特兒界的新鮮人，亮眼的程度，與長者一般老氣、衰退的既有形象甚有落差；Zip就是想打破這個傳統想像！

曾任記者的她，寫過不少長者專題，「起初都會唔知點同佢哋相處， 但慢慢發現佢哋唔係想像中咁『老』，試過採訪一啲長者表演，佢哋好有型有款，同大家想像好唔同」。 她說，曾向友人解釋其專訪目的，為帶出aging gracefully的理念，但始終空談難以令人理解，便想到踏前一步，以行動宣揚理念—她今年初正式成立 銀髮模特兒 公司「老正工作室」，招募長者做麻豆，真人演繹變老都可以好精彩。

張艾渟（Zip）｜老正工作室創辦人——

成立銀髮model，係想證明model唔係後生嘅世界；
其實五、六十歲一啲都唔老，佢哋好有潛力，
我真心覺得佢哋係未被發掘嘅寶藏。

銀髮模特兒 圓夢：我有talent！

銀模的工作包括拍平面、電視廣告，早前他們更接受新挑戰，走出影樓，在商場行catwalk！回帶到貓步訓練當日，銀模們都十分認真， 抓緊時間背熟走位，出錯時又會互相取笑一下，氣氛仍然是輕鬆的；唯獨是Regina，兩小時的訓練中， 她都沒什麼笑容，只默默唸著拍子「一、二、三、四」， 導師都三番四次提醒她要放鬆一點。「其實我好慢熱㗎，從來都唔做主動。」58歲的Regina這樣解釋， 但這次她卻自薦成為模特兒，原來是為了續寫34年前的模特兒人生。

Regina|年齡：58|銀模資歷：3個月——

我冇諗過退休！
老人家唔郁好危險，好快老人癡呆，
我見盡身邊嘅長輩都係咁！

Regina 24歲時，曾被模特兒公司發掘，但當年社會較封閉，已為人妻的她不適合拋頭露面，最後只上了一堂訓練便結束了。之後她一直從事時裝生意， 打扮新潮的她，數年前在街上被日本雜誌叫停影街拍；人生中總是與模特兒有一點緣份。

「可能我有呢個talent呢！前半生要照顧家人， 又好介意其他人眼光，一個個機會都冇珍惜，但我今次唔理喇，我一定要say yes！」她初次影造型照， 攝影師已十分滿意，毋須特別指導便迅速完成；在時裝騷裡，又被安排首位出場，都是她年輕時未發揮的潛質。

時裝騷圓滿結束，「好正呀！」Regina興奮地說，感覺不是來自成為眾人焦點的虛榮， 而是「最享受大家一齊突破自己！老實講我哋呢啲年紀，唔係要追求成名，只係想盡力，唔好有後悔！」

Senior版Project Runway

其實工作室剛剛成立，Zip關顧到模特兒都是新人，本來只想專注拍攝硬照， 但銀模們的超班表現，讓她有信心接下暑假舉行的天橋騷， 「其實佢哋都緊張，但表現到好淡定， 我相信係同歷煉有關，佢哋都應該見過唔少大場面啦」。

表演倒數前5日

Zip特別找來導師教銀模們行貓步，力求專業演出。

時裝騷當日
7am　晨早到達會場，先來個騷前健身操。

10am　男女model都有專人化妝，華麗變身。

12nn　在後台換衫，準備綵排。

2:45pm Show time!

是次為環保時裝騷，他們擺出很cool的表情， 配合服飾。

他們不只來回直走，還有交叉走位，要記住兩場走位也絕不輕鬆。

他們都不怕鏡頭，自信地擺pose任你影。

4pm　Good Show！梗係要拍照留念！

男士都做銀模：我都貪靚㗎！

大家可能覺得，女人愛美，應該較多女士應徵銀模； 但Zip說，其實男士也不少！Neil是其中一位，「我都貪靚㗎！其實人人都鍾意靚嘢嘅！」

Neil |年齡：64 |銀模資歷：2個月——

以前做生意好多嘢做，慢慢淡落嚟，都唔知做乜好，
心理有落差，所以一定要搵嘢做充實自己。

Neil今年64歲，曾從事製衣業，所以亦很注重時裝服飾。退休後，他平日會做運動、跟太太逛街，「但往後仲有成廿年，一路咁會好悶」。沒有退休大計的他，偶然在一次電台節目中得悉「老正工作室」，便與太太一起報名。「模特兒不嬲都係靚仔、靚女㗎嘛，我哋都得？覺得好有趣！不過其實都有猶疑，會唔會畀人笑呢？但只係一剎那，因為人生咩都要試下，冇所謂啦！」

目前他拍過造型硬照、染髮廣告，深深被模特兒的工作吸引，因為正好為退休生活加點趣味，「表現都ok呀！我都係平常心，至於有冇潛質， 就留返其他人評論啦！」Neil與Regina都一樣豁出去了，也許是這份豁達，令初哥都能在鏡頭下自然發揮，讓我們另眼相看。

有心 有力 有生產力！

我哋唔係要一夜成名，係要活在當下！

Zip洽商時裝騷這工作機會時，毫不猶疑便接了，「雖然model們大部分都未接觸過演藝界，但其實拍硬照都係第一次。佢哋學嘢好快，效果好好，令我信心大增；唔好低估佢哋嘅工作能力呀」。光看造型照便知道，叫他們chok樣、擺pose無難度，「佢哋嘅表現好impressive；好有潛力，我真心覺得佢哋係未被發掘嘅寶藏」。

別說外人，即使已是「員工」的銀模們， 都未完全相信自己的能力—他們有時會拒絕受薪， 覺得只是來幫Zip忙、來玩玩，「我會同佢哋講，客人係認同佢哋嘅能力先出錢請；呢個關係可以證明佢哋係被需要，而呢種感覺對退休人士好重要」。

數年採訪長者的經驗，讓Zip理解到他們退休後的落寞：害怕變老；愈老，生活上愈少選擇—她旗下有個model本身做生意，退休後竟然去送外賣，「一下子冇嘢做會唔慣，佢哋未必要有咩退休大計，只係仍然想有生產嘅感覺」。而受薪模特兒工作，是一份認同，也令他們有滿足感，「有個男model同我分享， 帶孫仔去睇佢印喺巴士嘅廣告，佢哋好開心； 我都好開心， 呢個都係我嘅原意」。

250萬長者人口 你準備好未？

寫稿之時，刻意改用「銀模」此名， 因為確實說不出他們是「老模」：外表逆齡之外， 事實上花甲之年亦不老。今年七月，日本厚生勞動省公布，香港人男女平均壽命成為全球之冠， 分別是81.24及87.32歲，五、六十歲絕對可稱為「年輕」；政府亦推算，2040年長者將佔總人口30%， 近250萬人， 「唔通到時1/3人都唔做嘢？ 『老正』就係想回應呢個議題。長者再就業呢個概念，喺香港算新興，其實人人都變老， 希望大家認識、關注」。

一心想創業的Zip，想透過「老正」帶出人口老化的議題，但起初亦怕太過冷門：銀髮模特兒真的有需求？退休廣告也拍不了很多吧？但一路做下來， 發現市場甚大，由保險、醫療、健康產品、生活百貨，以及關於家庭的廣告，都需要銀模，他們一直在我們身邊悄悄地存在。

「無論係佢哋嘅工作能力，抑或市場需要， 都係被忽略嘅一塊」，而她選擇用模特兒工作去填補這個缺口，「大家都覺得model係後生嘅世界，如果咁extreme嘅行業，都接受到銀髮族， 咁其他主流消費，行街、食飯、睇戲，都會更重視呢個群組」。

老正工作室
如有興趣成為銀髮模特兒，可傳2張近照、姓名、年齡、興趣、演出經驗（歡迎新鮮人）、參加原因、聯絡方法至 [email protected]。
網址：www.ohh-dear.com
FB：OHHDearHK