【藍橘子】《千奇百趣偷食理由》

奇怪地，當情侶決定要分手，就會有好多原因。例如性格不合，熱戀期已過，星座唔夾，了解太深…
但當我哋年齡愈大，愈無本錢去分手。
一來自知市場價值愈來愈細，又或者已經無心力耐性去習慣另一個人。
就算對方有缺點都會盡量遷就，性格不合就花時間去磨合，星座唔夾…就唔信星座囉。
於是，分手嘅原因所剩無幾，最後得番「出軌」…
當然啦，無論係男或女都有機會偷食，身邊朋友亦發生唔少偷食個案，總結以下幾個「偷食原因」都幾搞笑。

１）老婆大肚
雖然醫生話大肚可以有正常但唔激烈嘅性行為，但好多男人喺呢段時間都忍唔住出去偷食。大肚婆情緒起伏大，有時真係無mood做性事，男人就有藉口出去偷食。呢種情況最慘嘅係，好多女人都為咗肚入面嗰個而選擇啞忍。

２）唔肯玩情趣玩具
有位女性朋友嘅男友，佢非常好鍾意玩情趣玩具，仲愈買愈過分，女性朋友唔肯，仲鬧佢變態。結果男方就以呢個做藉口出去偷食，仲話番佢轉頭：「妳唔肯玩嘛！我咪出去同其他人玩囉！」當然，結局係分手收場。
３）你咁短
呢個案例又係黐線，個女仔嫌男朋友滿足唔到佢，結果出去搵其他男人。被揭發之後女方竟然親口承認自己對呢方面非常有需求，仲話「嗱我應承你唔好鍾意其他人，淨係one night stand」。呢頂綠帽真係由頭戴到落腳趾尾。

４）妳都係第三者咋
呢個最經典，連我係男人一聽到都硬晒（拳頭）。話說女方發現男朋友偷食，仲唔止第一次。點知個男人話：「妳當初都係第三者嚟咋，妳識我第一日已經係呢種人。老實講妳都無諗住同我一世㗎啦。」喂大佬！你咁樣點同你一世啊…
總結：
我理解喜歡新事物、貪新鮮係人嘅天性，十個男人有十個都係鹹濕。但當知道偷食嘅代價係破壞一段關係同埋令伴侶傷心，我會選擇唔偷食囉。
有人認為「向女友報告行蹤」「不夜歸」係怕女友／老婆嘅表現。
但我覺得，呢種唔係怕，而係唔想失去另一半。