周末半日遊 – 上水至落馬州單車路線@ Miss Sunny

Jan 3 2018

踩單車來來去去都係沙田到大埔，屯門到元朗？今次 Miss Sunny 就由上水踩到落馬州。整條落馬州單車路線，沿路主要都係平地，人煙稀少，相當寧靜，感覺好似置身台中一樣呢！如果純踩單車，唔計停留景點時間，大約 2.5小時就完成，屬於輕鬆路線。沿途可以飽覽水塘景觀、觀賞濕地雀鳥，仲會經過攝影聖地 – 大水渠𠻹！

（文章轉載：Photoblog）

建議路線：上水火車站 A3 出口 (約 0.35km) > 單車特賣場 Bike Store HK (約 2.2km)> 梧桐河 (約 0.8km)> 大水管(約 0.6km) > 羅太豆花 (約 1.5km)> 得月樓警崗 (約 2.2km)> 信義新村 (約 4.6km)> 落馬洲濕地(全程約 12.2km)

落馬州單車路線第一站：上水出發租單車

上星期五天氣唔錯，廿幾度，又有少少涼風，最啱踩單車！Miss Sunny 就約咗幾個朋友，朝早 10點出發租單車。租單車嘅地方都幾易搵，上水火車站A3 出口行大約 5分鐘就到「單車特賣場 Bike Store HK」。普通車 $50租一日，比起沙田平呢！如果想踩得舒服啲，可以租有高級避震嘅單車，都只係 $120租一日。檢查清楚，相機、地圖、蚊怕水都帶齊就可以出發了！

落馬州單車路線第二站：暢遊梧桐河畔

接著就係大約半小時的路程，先上天橋，經深港中心後，沿梧桐河向北踩。梧桐河左面係一片片農田，田邊又好幾間鐵皮屋。沿路仲會見到唔少雀仔同牛牛，好有鄉村風味！一路踩，有少少涼風，感覺好舒服。雖然過了行人天橋後，馬路上嘅汽車數量變得非常少，不過大家都要注意安全啊！

落馬州單車路線第三站：攝影聖地大水管

沿著梧桐河一路踩到盡頭，就係今次旅程中最靚嘅影相位之一。火車係頭頂駛過，高高嘅電線杆，穿插著一條條又粗又大嘅水管，景色非常獨特。如果唔太曬的話，大家可以泊低單車，係水管間影吓相，休息吓。不過影還影，唔好踩上水管呀！

落馬州單車路線第四站：$12任食豆腐花

踩多 8分鐘左右，十字路口附近會有路牌指示，指示你去到「羅太豆腐花」。大家踩到攰都係時候休息吓！呢度最出名就係 $12 豆腐花同豆漿放題。身水身汗嘅時間食碗嫩滑嘅豆腐花，真係夠晒歎！食幾碗豆腐花都唔夠飽的話，呢度仲提供兩餸飯同餐肉煎蛋公仔麵，不妨係度充充電！

落馬州單車路線第五站：邊境地標得月樓

休息夠又要繼續行程。踩大約 20分鐘左右就會見到近年先開放嘅得月樓村。呢度係邊境禁區之一，村民要有禁區紙先可以入去。雖然得月樓村與港鐵站僅一河之隔，但得月樓村長滿樹木，與人來人往嘅港鐵站同深圳羅湖口岸聯檢大樓，有明顯嘅對比。當然，Miss Sunny 沒有禁區紙，我們一行人就只可以經過得月樓警崗，看看呢個特別嘅景色。

落馬州單車路線第六站：返璞歸真信義新村

喺得月樓警崗向西邊，一直踩就係信義新村。沿路主要都係農田同草地，仲有好多芒草𠻹！踩半小時左右就會到馬草壟信義新村合作社。雖然外表簡陋，但就係旅程嘅最後一個補給站，要好好把握時間休息。再經過馬草壟會見到一個小水塘，望遠少少就已經見到深圳嘅高樓大廈，形成強烈對比。

落馬州單車路線最後一站：寧靜的落馬洲濕地

過咗信義新村就係落馬洲，好多人都會選擇回程，但其實呢度都有唔少嘢睇。向新田方向出發，經過落馬洲公共交通轉車站，再經過新田購物城，從惇裕路一直踩，大約一個鐘就會到今次落馬州單車路線最後一站！落馬洲濕地係由港鐵管理嘅人工濕地之一。因為要保護啲候鳥，一般都唔會對外開放。不過係旁邊欣賞，都已經好舒服，想思緒平靜一吓嘅人，一定會好鍾意！