香港都有大峽谷! 輕鬆行 菠蘿山 影靚相!

撰文及攝影：Mandy

2017年更新：屯門「菠蘿山」路段，近年成為最易生意外的郊遊路段之一，未到夏季已有多宗登山求助個案。讀者出發前，請自行評估體力，需知道這路段絕非政府規劃的郊遊徑，沿途沒遮擋而且多碎石，要避免中暑求助收場，敬請做足準備，宜找經驗登山友同行，為人為己，新手初哥切勿輕率前往！（圖片來源：《蘋果日報》即時新聞）

菠蘿山 : 港版大峽谷!

菠蘿山 的入口正正在屯門良景邨後，保良局黃錦全小學附近，非常易搵。頭段以斜路為主，我體能又差、又邊走邊休息，大約45分鐘就上完斜。

斜路之後就是平路，有山路亦有石屎路，非常輕鬆。沿路only one way out，行多一會兒就到達大峽谷。

終於來到重點：大！峽！谷！相片可能未必感受到大峽谷的氣勢，大家可以留意右上角的「小矮人」，想像一下峽谷到底有多深、有多壯觀！因此不少人都慕名而來拍照。

要到對面拍照，就要行過下圖這條小路，如果畏高的朋友仔，可以選擇行右邊的下路，應該比較有安全感。不過近年這條小路變得愈來愈窄，明顯已經開始沙化，所以大家記得要小心點 ！

一場來到當然要自拍！

明明Mandy都有176cm高，但與大峽谷相比，都顯得十分渺小。

靚相背後，其實驚到不行，因為這個影相位其實好窄，稍為大風一點都怕被吹跌。

攝影師哥哥就負責在另一邊影靚相～

提提大家，其實峽谷前有指示牌，警告大家「此路危險，不得擅進」。這裡有一定的風險問題，大家記得打醒十二分精神，並考慮清楚風險才出發。

影完大峽谷，可以選擇沿路折返，亦可以選擇繼續向前行，最後會到達下白泥，可以睇日落。由良景出發去到下白泥，包括拍照時間在內，3小時內就可以完成，新手都應付得到。

睇完日落，記得留低影Magic Moment，這個時候才是最美！

不過日落過後，所有人都會同時湧到小巴站，乘坐小巴出元朗，所以都要預留大約1小時等車，最好預備蚊怕水，否則企定定等車的同時，蚊仔亦會開餐。

***提提大家，去任何郊野地方都記得要帶走垃圾，愛護環境呀～
* 出發前請準備所需裝備，如水、糧食、通訊工具及御寒衣服
* 出發前，請自行評估身體狀況，免生意外
* 請保持環境安寧，切勿破壞大自然
* 注意個人安全，切勿做出危險動作

延伸閱讀
海洋公園夏水禮 2016! 海綿寶寶濕身過暑假
想知更多好玩旅遊生活資訊，留意Mandy facebook專頁：