自製Avatar去滙豐元宇宙藝術館 睇本地藝術家作品

打破虛實界限 將藝術帶畀大眾

講起藝術，可能好多人都覺得好遙不可及。今次，滙豐為咗進一步拉近大眾同藝術嘅距離，打破虛實界限，將藝術體驗引進數碼世界，融會藝術同科技，等大家都可以免費試下沉浸式咁欣賞藝術，同大家一齊「藝想大開」！為咗支持本地創作，滙豐今次仲特設「本地藝術家展館」，利用科技呈現本地藝術家作品；為本地藝術家提供多一個平台，將佢哋嘅作品介紹畀更多人認識！

自製虛擬化身走入3大展館 仲可以同朋友Social

入去HSBC滙豐元宇宙藝術館之前，大家要先整個Avatar。大家可以自由配搭髮型、衫同埋飾物，盡情幫自己set個潮人look。整完，大家就會獲得1個code，之後再入去藝術館嘅時候就唔使重新整過。

一切準備就緒，虛擬化身就會走入隧道，到達展覽館嘅藝術廣場（Hub）。喺呢度大家可以體驗到一日入面嘅時間流逝，大廳嘅透明天花一樣睇到日頭、黃昏Magic Hour同夜晚嘅分別。喺呢度遇到朋友，仲可以同佢Social，揮手呢啲都做到！大家仲可以喺入面影相！

除咗藝術廣場，滙豐元宇宙藝術館仲有兩個展館，分別係「本地藝術家展館」同埋「滙豐展館」。

展出3位本地藝術家作品 幫部份作品進一步數碼化

「本地藝術家展館」將會展出3位本地藝術家一共9件作品。呢3位本地藝術家分別係插畫師飛天豬、動畫家兼平面設計師黃炳，同埋漫畫家楊學德。

大家入到去展館，四周嘅牆上都有藝術品睇，行到去展館嘅中央，大家會見到一本巨型嘅「書」，大家可以逐頁翻開，欣賞佢哋嘅作品。

今次，滙豐仲揀選咗部份作品出嚟，進一步數碼化佢哋！好似下圖嘅例子咁，大家行埋去嘅時候，作品瞬間好似包圍住自己咁樣。大家可以逐件作品行埋去睇，睇下會有啲咩效果！

至於「滙豐展館」，亦會展出大約1,000個虛擬化身NFT Avators，當大家行埋去部份NFT前面，眼前嘅2D化身會自動變成3D嘅全息像，好似下圖咁樣，勁立體。大家覺得好正，拍手嘅話，其他人都會同步見到！

係咪覺得好正呢～快啲約埋朋友，元宇宙見啦！

今次滙豐元宇宙藝術館開張，只係一個開始。將來，呢度仲會舉辦藝術家嘅虛擬分享會，等大家可以一齊傾偈，交流下諗法！到時記得留意啦！

資料來源：HSBC