6日種自家菜?! 綠色生活5大法寶
種自家菜 － 01指尖上的易種芽菜
要 種自家菜 可能有點難，不過種自家芽菜就話咁易。芽菜有完整的營養，例如有鈣、鎂、鉀等礦物質，又有維生素C 及活性植物蛋白，所以近年大熱。這款來自美國的發芽杯算係懶人恩物，杯設計分為外杯、內杯及氣隔，疏氣的氣隔置於外杯底，內杯用來裝種籽，特有氣隔令內杯提升及疏水，唔會浸壞種籽。做法好簡單，將半個量杯的種籽用清水浸12小時，然後倒走水，每日早晚用清水沖洗一次，約4至6日便會發芽。
記者用有機法式混合芽菜種籽試種，含火箭菜、水芹、櫻桃蘿蔔、葫蘆巴等不同種籽，第四天芽菜有約2cm 長，相信等多兩日就可以收成！想快手有收成，貼士係買細細粒的種子就最好！
02海鮮質「素」高
台灣有對父母為了幫愛食海鮮又會周身敏感的女兒Sophie，解決敏感煩惱，於是生產了一系列的急凍海鮮取代真海鮮，有蟹、蝦、帶子同魚，全都是蔬食（Vegan）。記者試食蟹餅，慢火煎香，因為有蒟蒻扮蟹肉，入口質感頗似蟹肉，連香味也似！以後食素海鮮又多一個選擇啦。
03天然噴走狐臭味
夏天為大家帶來狐味，近日又熱又濕，想止汗又怕化學成分致癌，真是令人兩難。公平點天然抗菌身體噴霧，用5種天然公平貿易香薰油調配而成，原理是利用當中的迷迭香、薄荷、薰衣草天然香薰油，為身體帶來天然抗菌作用，抑制引致體臭的細菌，無阻正常排汗，同時除臭。今個夏天就開始天然去狐法吧！
04手製恆久戒指盒
不少金行都會用膠盒裝住戒指，不過膠盒仔用耐了會變質甚至溶化。有手作人就開班教大家怎樣做柚木戒指盒，當然也可以度身訂造，約兩星期便可取貨。木盒除了靚之外，更重要是減膠減廢，下次送戒指給情人的時候，不妨考慮下。
05帶著靚靚蚊膏去旅行
呢排日日都落雨， 啲蚊都湧晒出來，放假去郊外，最怕被蚊咬。手作品牌tAb（ take A break）製作了七彩蚊膏頸鏈，同專門生產天然蚊膏的「聞香記」合作，用小袋子連天然蚊膏一齊配搭，掛在身就隨時可以對付蚊叮，旅途更安心。
